O‘zbekiston va Turkmaniston TIVlari o'rtasida hamkorlik dasturi imzolandi

2026-yil 14-iyul kuni O‘zbekiston tashqi ishlar vaziri Baxtiyor Saidov boshchiligidagi delegatsiya Turkmanistonning Ashxobod shahriga rasmiy tashrif bilan bordi.

 

 

Tashrif doirasida delegatsiyani Turkmaniston Prezidenti Serdar Berdimuhamedov qabul qildi. Uchrashuvda Prezident Shavkat Mirziyoyevning samimiy salomi va ezgu tilaklari yetkazildi.

 

 

Muloqot chog‘ida O‘zbekiston va Turkmaniston o‘rtasidagi strategik sheriklik izchil rivojlanayotgani, siyosiy muloqot faollashgani hamda o‘zaro savdo hajmi barqaror o‘sayotgani qayd etildi. Tomonlar ko‘p asrlik do‘stlik va yaxshi qo‘shnichilik munosabatlarini yanada mustahkamlashga tayyor ekanini tasdiqladi.

 

Shuningdek, Baxtiyor Saidov Turkmaniston Vazirlar Mahkamasi Raisi o‘rinbosari, tashqi ishlar vaziri Rashid Meredov bilan tor doirada muzokaralar o‘tkazdi. Unda oliy darajada erishilgan kelishuvlarni amalga oshirish, siyosiy muloqotni davom ettirish, savdo-iqtisodiy, transport-logistika, energetika, madaniy-gumanitar va chegaraoldi hamkorligini kengaytirish masalalari muhokama qilindi.

 

 

Muzokaralar yakunida xalqaro axborot xavfsizligini ta’minlash sohasida hamkorlik to‘g‘risidagi hukumatlararo bitim hamda O‘zbekiston va Turkmaniston Tashqi ishlar vazirliklari o‘rtasida 2027–2028-yillarga mo‘ljallangan hamkorlik dasturi imzolandi.

 

Tashrif doirasida ikki davlat tashqi ishlar vazirliklari o‘rtasidagi siyosiy maslahatlashuvlarning navbatdagi davrasi ham bo‘lib o‘tdi. Unda davlat rahbarlari topshiriqlari ijrosi, ikki tomonlama hamkorlikning ustuvor yo‘nalishlari, shuningdek, mintaqaviy va xalqaro kun tartibidagi masalalar yuzasidan fikr almashildi. 

 

Tomonlar siyosiy maslahatlashuvlar mexanizmi tashqi siyosat idoralari o‘rtasidagi muntazam muloqotni yanada mustahkamlashga xizmat qilishini ta’kidladi.