O‘zbekistonda “TOP-100” rahbarlar tanlovi yo‘lga qo‘yiladi

Prezident Shavkat Mirziyoyev iqtidorli boshqaruvchilar, liderlar va yangi avlod rahbarlarini aniqlash hamda “El-yurt umidi” jamg‘armasi orqali iste’dodli yoshlarni qo‘llab-quvvatlash bo‘yicha taqdimot bilan tanishdi.

 

Taqdimotda mamlakatda davlat boshqaruvi va iqtisodiyotning zamonaviy ehtiyojlaridan kelib chiqib, boshqaruv kadrlarini tayyorlashning yangi tizimini joriy etish taklif etildi. 

 

Qayd etilishicha, sun’iy intellekt yordamida o‘tkazilgan tahlillar natijasida energetika, “yashil” texnologiyalar, qurilish, qishloq va suv xo‘jaligi, raqamlashtirish hamda xizmat ko‘rsatish kabi yo‘nalishlarda 50 dan ortiq zamonaviy kasb bo‘yicha malakali rahbar kadrlarga ehtiyoj mavjudligi aniqlangan.

 

Yangi tizimga ko‘ra, nomzodlarni baholashda an’anaviy “obyektivka” usulidan voz kechilib, ularning bilim va tajribasi, strategik fikrlashi, psixologik xususiyatlari hamda liderlik salohiyatini qamrab oluvchi portfolio tizimi joriy etiladi. Istiqbolli boshqaruvchilar 100 ballik mezon asosida baholanadi, sun’iy intellekt yordamida ular uchun individual kasbiy rivojlanish rejalari ishlab chiqiladi.

 

Shuningdek, har ikki yilda 500 nafar istiqbolli boshqaruvchini saralab olish va 2030-yilgacha 1,5 ming nafar yuqori salohiyatli mutaxassisdan iborat milliy rahbar kadrlar zaxirasini shakllantirish rejalashtirilgan.

 

Taqdimotda rahbarlik lavozimlari uchun zaxirani shaffof shakllantirish maqsadida “TOP-100” ochiq tanlovini o‘tkazish mexanizmi ham taqdim etildi. Tanlov agrar soha, sog‘liqni saqlash, ta’lim, tadbirkorlik, sud-huquq, axborot texnologiyalari va sun’iy intellekt kabi yo‘nalishlarni qamrab oladi. Nomzodlar test, kompleks kasbiy baholash va suhbat bosqichlaridan o‘tadi, g‘oliblar esa maxsus tayyorgarlikdan so‘ng milliy kadrlar zaxirasiga kiritiladi.

 

Bundan tashqari, xorijda tahsil olayotgan yoshlarni davlat va xususiy sektor faoliyatiga jalb etish maqsadida 2026-yil 1-oktabrdan career.edu.uz platformasida “Xorijdagi talabalar” moduli ishga tushirilishi rejalashtirilgan. U orqali chet elda ta’lim olayotgan yoshlarning amaliyot o‘tashi, ish beruvchilar bilan hamkorligi va keyinchalik ishga joylashishiga ko‘maklashiladi.