JCH—2026: Argentina Angliyani 2:1 hisobida mag‘lub etib, finalga chiqdi
19-iyul kuni Jahon chempionati finalida Ispaniya va Argentina chempionlik uchun bahs olib boradi.
Argentina terma jamoasi 2026-yilgi FIFA Jahon chempionatining ikkinchi yarim finalida Angliyani 2:1 hisobida mag‘lub etib, final yo‘llanmasini qo‘lga kiritdi.
AQShning Atlanta shahridagi Mercedes-Benz Stadiumda bo‘lib o‘tgan uchrashuvni amerikalik hakam Ismoil Elfat boshqarib bordi.
Hisob o‘yinning 55-daqiqasida Angliya hujumchisi Entoni Gordon tomonidan ochildi. Argentina 85-daqiqada Enso Fernandesning goli evaziga muvozanatni tikladi. Asosiy vaqtga qo‘shib berilgan 2-daqiqada esa Lautaro Martines raqib darvozasini ishg‘ol qilib, Argentinaga g‘alaba keltirdi.
Uchrashuvda Lionel Messi ikkita golli uzatmani amalga oshirdi. Shuningdek, u 39 yosh-u 21 kunligida Jahon chempionati yarim finalida maydonga tushgan eng yoshi katta maydon o‘yinchisi sifatida tarixga kirdi.
Mazkur natija bilan amaldagi jahon chempioni Argentina ketma-ket ikkinchi bor Jahon chempionati finaliga yo‘l oldi.
Finalda Lionel Skaloni shogirdlari avvalroq Fransiyani 2:0 hisobida mag‘lub etgan Ispaniya terma jamoasiga qarshi maydonga tushadi.
Final uchrashuvi 19-iyul kuni bo‘lib o‘tadi. Uchinchi o‘rin uchun bahsda esa Angliya va Fransiya terma jamoalari o‘zaro to‘qnash keladi.
