Xorazmda Rossiyada olib kelingan qariyb 1,3 kg gashish musodara qilindi
Shuningdek, Yuqorichirchiq tumanida narkokuryerlar xufiya joyga qoldirib ketgan 700 gramm gashishni olayotgan fuqaro qo‘lga olindi.
Davlat xavfsizlik xizmati, Ichki ishlar vazirligi hamda Bojxona organlari xodimlari hamkorligida o‘tkazilgan “Xavfsiz va sog‘lom yurt” tezkor-profilaktik tadbirlari doirasida xorijdan olib kelingan giyohvandlik vositalarining noqonuniy aylanmasiga chek qo‘yildi. Bu haqda DXX xabar berdi.
Ma’lum qilinishicha, Xorazm viloyatida o‘tkazilgan tezkor tadbirda Urganch shahrida yashovchi, 1997-yilda tug‘ilgan, avval giyohvandlik vositalari bilan bog‘liq jinoyati uchun sudlangan fuqaro Urganch xalqaro aeroportida Rossiya Federatsiyasidan yuborilgan jo‘natmani qabul qilib olayotgan vaqtda qo‘lga olingan.
Tekshiruv davomida jo‘natma ichidagi turli shirinliklar orasiga shokolad ko‘rinishida yashirilgan 538 gramm “gashish” moddasi aniqlangan.
Yana bir holatda, Toshkent viloyatining Yuqorichirchiq tumanida poytaxtlik 45 yoshli fuqaro narkokuryerlar tomonidan mamlakatga kontrabanda yo‘li bilan olib kirilib, oldindan xufiya joyga yashirib ketilgan 700 gramm “gashish” moddasini qabul qilib olayotgan vaqtida ushlangan.
Hozirda har ikkala holat yuzasidan jinoyat ishlari qo‘zg‘atilib, tergov harakatlari olib borilmoqda. Shuningdek, mazkur jinoyatlarga aloqador boshqa shaxslarni aniqlash bo‘yicha tezkor-surishtiruv tadbirlari davom ettirilmoqda.
