OTM va texnikumlarga kirish test sinovlari yakunlandi
O‘n kun davom etgan imtihonlarda 610 mingdan ortiq abituriyent ishtirok etdi. Yo‘nalish tanlash 25-iyuldan boshlanadi.
23-iyul kuni davlat oliy va kasbiy ta’lim muassasalariga qabul test sinovlarining so‘nggi kuni bo‘lib o‘tdi. Bilim va malakalarni baholash agentligi ma’lumotiga ko‘ra, yakuniy kunda test topshirishi rejalashtirilgan 45 ming 520 nafar abituriyentning 45 ming nafardan ortig‘i imtihonda qatnashgan. Shu kuni tartib-qoidalarni buzganlar qayd etilmadi.
Ma’lum qilinishicha, o‘n kun davomida test sinovlarida qatnashishi belgilangan jami 664 ming 609 nafar abituriyentdan 610 ming nafardan ortig‘i imtihonlarda ishtirok etgan. Test sinovlari davomida tartib-qoidalarni buzgan 70 nafardan ortiq abituriyent imtihon jarayonidan chetlatilgan.
Agentlikning bildirishicha, test sinovlarining o‘ninchi kuni natijalari 24-iyul kuni e’lon qilinadi. Shundan so‘ng abituriyentlar 25-iyuldan 8-avgustga qadar (shu kuni ham) ikkinchi bosqich tanlovida ishtirok etib, oliy ta’lim muassasasi, ta’lim yo‘nalishi, ta’lim shakli va ustuvorliklarini tanlashi mumkin.
Yakuniy mandat natijalari esa ikkinchi bosqich tanlovi yakunlanganidan keyin bir hafta ichida e’lon qilinadi.
