Turkman xalqining milliy yetakchisi Shavkat Mirziyoyevni tavallud kuni bilan tabrikladi
Telefon muloqotida O‘zbekiston–Turkmaniston strategik sherikligi, savdo-iqtisodiy hamkorlik va mintaqaviy kun tartibidagi masalalar muhokama qilindi.
Prezident Shavkat Mirziyoyev 24-iyul kuni Turkman xalqining milliy yetakchisi, Turkmaniston Xalq Maslahati Raisi Gurbanguli Berdimuhamedov bilan telefon orqali muloqot qildi.
Suhbat avvalida Gurbanguli Berdimuhamedov davlat rahbarini tavallud kuni bilan samimiy tabriklab, mustahkam sog‘lik, baxt-saodat va davlat faoliyatida ulkan muvaffaqiyatlar, qardosh O‘zbekiston xalqiga esa tinchlik, farovonlik va ravnaq tiladi. Shuningdek, Turkmaniston Prezidenti Serdar Berdimuhamedovning samimiy salomi va ezgu tilaklarini yetkazdi.
Turkman xalqining milliy yetakchisi Prezident Shavkat Mirziyoyev rahbarligida amalga oshirilayotgan keng ko‘lamli islohotlar natijasida O‘zbekiston ijtimoiy-iqtisodiy hamda siyosiy taraqqiyotda muhim yutuqlarga erishayotganini alohida ta’kidladi.
Muloqot davomida oliy darajada erishilgan kelishuvlar ijrosi, O‘zbekiston va Turkmaniston o‘rtasidagi do‘stlik, yaxshi qo‘shnichilik hamda strategik sheriklik munosabatlarini yanada rivojlantirish masalalari muhokama qilindi.
Tomonlar o‘zaro savdo hajmi va yuk tashish ko‘rsatkichlari izchil ortib borayotganini, “Shovot–Toshhovuz” savdo zonasi faoliyati hamkorlikni kengaytirishga xizmat qilayotganini qayd etdilar. Energetika, sanoat, qishloq va suv xo‘jaligi hamda transport sohalaridagi qo‘shma loyihalar muvaffaqiyatli amalga oshirilayotgani ta’kidlandi.
Shuningdek, parlamentlararo, hududlararo, ishbilarmonlik va madaniy-gumanitar aloqalarni yanada rivojlantirish, shuningdek, joriy yil kuzda Avaza shahrida o‘tkazilishi rejalashtirilgan Markaziy Osiyo va Ozarbayjon davlat rahbarlarining navbatdagi Maslahat uchrashuvi yuzasidan ham fikr almashildi.
