Vladimir Putin Shavkat Mirziyoyevga tabrik yo'lladi
Rossiya Prezidenti ikki davlat o‘rtasidagi konstruktiv muloqot va yaqin hamkorlikni davom ettirishga tayyorligini bildirdi.
Rossiya Prezidenti Vladimir Putin Shavkat Mirziyoyevni tavallud kuni munosabati bilan tabrik yo‘lladi.
Tabrikda Vladimir Putin Shavkat Mirziyoyev rahbarligida O‘zbekiston ijtimoiy-iqtisodiy rivojlanishda salmoqli natijalarga erishgani, shuningdek, mamlakatning xalqaro maydondagi nufuzi sezilarli darajada oshganini alohida ta’kidladi.
Rossiya Prezidenti, shuningdek, Shavkat Mirziyoyevning Rossiya–O‘zbekiston keng qamrovli strategik sheriklik va ittifoqchilik munosabatlarini mustahkamlashga qo‘shgan ko‘p yillik shaxsiy hissasini yuqori baholadi.
Vladimir Putin tabrik yo‘llovida ikki davlat o‘rtasidagi do‘stona munosabatlarni yuksak qadrlashini bildirib, ikki tomonlama, mintaqaviy va xalqaro kun tartibidagi dolzarb masalalar yuzasidan konstruktiv muloqot hamda yaqin hamkorlikni davom ettirishdan mamnun bo‘lishini qayd etdi.
So‘ngida Rossiya Prezidenti Shavkat Mirziyoyevga mustahkam sog‘lik, baxt-saodat va davlat faoliyatida muvaffaqiyatlar, O‘zbekiston xalqiga esa tinchlik, farovonlik va yangi yutuqlar tiladi.
