Isroillik ko‘chmanchilar G‘arbiy Sohildagi ikki masjidga o‘t qo‘ydi

Falastin rasmiylari ma’lumotiga ko‘ra, yakshanba kuni tongda isroillik ko‘chmanchilar G‘arbiy Sohildagi Qusra va Kur qishloqlarida joylashgan masjidlarga hujum uyushtirgan. Bu haqda Reuters xabar berdi.

 

Qayd etilishicha, Nablus janubi-sharqidagi Qusra qishlog‘ida yaqinda qurib bitkazilgan masjid yoqib yuborilgan. Hujumchilar bino devorlariga ibroniy tilida "Yahudiylarning qasosi" degan yozuv hamda Tal qishlog‘i yaqinidagi to‘qnashuvda halok bo‘lgan isroilliklardan birining ismini yozib qoldirgan.

 

Shuningdek, Tulkarm janubi-sharqidagi Kur qishlog‘ida ham masjidga o‘t qo‘yishga urinish bo‘lgan. Mahalliy kengash vakili Farid Jiyusi ibodat qilayotgan fuqarolar yong‘inni masjidning asosiy qismiga tarqalishidan oldin o‘chirganini ma’lum qilgan.

 

Mazkur hujumlar 25-iyul kuni Nablus yaqinidagi Tal qishlog‘ida yuz bergan qurolli to‘qnashuv ortidan sodir bo‘ldi. O‘shanda isroillik ko‘chmanchilar bostirib kirgan hududda yuz bergan otishmada to‘rt nafar falastinlik va ikki nafar Isroil askari halok bo‘lgan edi.

 

Isroil armiyasi Qusra qishlog‘ida o‘t qo‘yish va grafitilar yozilgani tasdiqlanganini, gumonlanuvchilarni qidirish ishlari olib borilayotganini bildirdi. Harbiylar diniy maskanlarga qilingan hujumlarni qoralab, voqea yuzasidan dalillar to‘planayotganini ma’lum qilgan.

 

BMT va Falastin ma’muriyati ma’lumotlariga ko‘ra, 2023-yil oktabr oyida G‘azodagi urush boshlanganidan buyon G‘arbiy Sohilda isroillik ko‘chmanchilarning falastinliklarga hujumlari keskin ko‘paygan. Joriy yilning o‘zida bunday to‘qnashuvlarda o‘nlab falastinlik halok bo‘lgan, yuzlab kishi jarohatlangan.

 

Juma kungi hodisadan so‘ng Isroil bosh vaziri Binyamin Netanyaxu hududga qo‘shimcha harbiy kuchlar yuborishni buyurdi hamda xavfsizlikni kuchaytirish maqsadida yangi yahudiy posyolkalarini qurishga ruxsat berilishini ma’lum qildi.