Navoiyda Damas’da 17 nafar bog‘cha bolasi tashigan haydovchi jazolandi
Holat yuzasidan unga nisbatan ma’muriy chora qo‘llanildi.
Navoiy viloyati Qiziltepa tumanida bog‘cha tarbiyalanuvchilarini transportda tashish qoidalarini buzgan haydovchiga nisbatan qonuniy chora ko‘rildi.
Ma’lum qilinishicha, holat 21-iyul kuni Qiziltepa tumanidagi Vang‘ozi mahalla fuqarolar yig‘ini hududida xizmat olib borayotgan huquqbuzarliklar profilaktikasi inspektorlari tomonidan aniqlangan.
Tekshiruv davomida Damas avtomobilining old o‘rindig‘ida uch nafar bola o‘tirgani ma’lum bo‘lgan. Transport vositasi to‘xtatilgach, unda haydovchidan tashqari 17 nafar bog‘cha tarbiyalanuvchisi va bir nafar bog‘cha xodimasi borligi aniqlangan. Shu tariqa avtomobilda jami 18 nafar yo‘lovchi tashilgan.
Qayd etilishicha, haydovchi huquqni muhofaza qiluvchi organ xodimlarining qonuniy talabiga bo‘ysunmay, voqea joyidan ketishga uringan. Shundan so‘ng avtomobildagi bolalar tushirib olingan. Haydovchining baland ovozda bahslashgani oqibatida ayrim bolalar qo‘rqib yig‘lab yuborgan.
Mazkur holat yuzasidan Yo‘l-patrul xizmati xodimlari tomonidan haydovchiga nisbatan belgilangan tartibda ma’muriy chora qo‘llanilgan. Haydovchi o‘z izohida bog‘cha bolalarini tashishda yo‘lovchi tashish qoidalarini buzganini hamda bolalar hayotini xavf ostiga qo‘yganini tan olgan.
