Prezident yangi tayinlangan xorijiy elchilarni qabul qildi

 

28-iyul kuni o‘tkazilgan tantanali marosimda davlat rahbari Italiya, Falastin, Saudiya Arabistoni, Kuvayt, Jazoir, Malayziya, Pokiston, Ozarbayjon va Qozog‘istonning favqulodda va muxtor elchilaridan ishonch yorliqlarini qabul qildi.

 

Prezident yangi tayinlangan diplomatlarni Yangi O‘zbekistondagi mas’uliyatli faoliyati boshlangani bilan tabriklab, bugungi murakkab geosiyosiy vaziyatda diplomatik muloqot va hamkorlikning ahamiyati yanada ortib borayotganini ta’kidladi.

 

Uchrashuv davomida har bir davlat bilan siyosiy, savdo-iqtisodiy, investitsiyaviy va madaniy-gumanitar hamkorlikni yanada kengaytirish istiqbollari muhokama qilindi.

 

Davlat rahbari Italiya bilan “yashil” energetika, metallurgiya, kimyo, qishloq xo‘jaligi, sog‘liqni saqlash, ta’lim va turizm sohalaridagi hamkorlikni, Falastin bilan esa azaliy do‘stlik munosabatlarini rivojlantirish muhimligini qayd etdi.

 

Saudiya Arabistoni bilan 25 milliard dollarlik investitsiya loyihalari portfeli shakllangani, Kuvayt bilan infratuzilma, sog‘liqni saqlash va ta’lim yo‘nalishlarida, Jazoir bilan energetika, tog‘-kon, qishloq xo‘jaligi va turizm sohalarida hamkorlikni kengaytirish bo‘yicha katta salohiyat mavjudligi ta’kidlandi.

 

Shuningdek, Malayziya bilan yarimo‘tkazgichlar, islom moliyasi va ziyorat turizmi, Pokiston bilan Transafg‘on transport yo‘lagi, sanoat kooperatsiyasi hamda energetika yo‘nalishlaridagi loyihalar, Ozarbayjon bilan investitsiya portfelini 10 milliard dollarga yetkazish, Qozog‘iston bilan esa o‘zaro savdo hajmini 10 milliard dollarga oshirish bo‘yicha ustuvor vazifalar belgilab olindi.

 

Marosim yakunida Prezident yangi tayinlangan elchilarga diplomatik faoliyatida muvaffaqiyat tilab, O‘zbekiston hududlari va xususiy sektori bilan faol hamkorlik qilishga chaqirdi. Elchilar esa o‘z navbatida mamlakatlar o‘rtasidagi ko‘p qirrali sheriklikni yanada rivojlantirish yo‘lida bor imkoniyatlarini safarbar etishlarini bildirdi.