“Zolotaya Korona” orqali pul o‘tkazmalari yangi operator orqali tiklanadi — Markaziy bank
Markaziy bank yangi operator orqali xizmatlar kelasi haftadan qayta yo‘lga qo‘yilishi kutilayotganini ma’lum qildi.
Markaziy bankning Valyutani tartibga solish va nazorat departamenti direktori Otabek Tojiddinovning 29-iyul kuni bo‘lib o‘tgan matbuot anjumanida ma’lum qilishicha, O‘zbekiston tijorat banklari “Zolotaya Korona” rahbariyati bilan hamkorlikda operatsiyalarni YI sanksiyalariga tushmagan boshqa bank orqali amalga oshirish yuzasidan muzokaralar olib bormoqda.
Uning aytishicha, yangi texnik operator orqali xizmatlarni kelasi haftadan boshlab tiklash rejalashtirilgan. Tojiddinov sanksiyalar “Zolotaya Korona” tizimining o‘ziga emas, balki operatsiyalar amalga oshirilgan bankka nisbatan joriy etilganini ta’kidladi.
Markaziy bank ma’lumotiga ko‘ra, 2026-yilning birinchi yarmida O‘zbekistonga xalqaro pul o‘tkazmalari hajmi 9,3 milliard dollarni tashkil etgan. Bu o‘tgan yilning mos davriga nisbatan 13 foizga ko‘p. Shundan 2,4 milliard dollari yoki qariyb 26 foizi “Zolotaya Korona” tizimi orqali amalga oshirilgan.
Tojiddinovning qayd etishicha, mazkur xizmatdan nafaqat Rossiyada, balki Janubiy Koreya, Turkiya, Qozog‘iston, Yevropa Ittifoqi davlatlari va boshqa mamlakatlarda mehnat qilayotgan O‘zbekiston fuqarolari ham foydalanadi. Uning fikricha, yuzaga kelgan vaziyatning mamlakatga bevosita ta’siri sezilarli emas va operatsiyalarni imkon qadar tezroq tiklash bo‘yicha zarur choralar ko‘rilmoqda.
Shuningdek, Markaziy bank vakili sanksiyalar pul-kredit siyosatiga ta’sir qilmaganini bildirib, ushbu omil asosiy stavkani 14 foiz darajasida saqlab qolish bo‘yicha qaror qabul qilishda hisobga olinmaganini aytdi. Chunki uning iste’mol narxlariga ta’siri ahamiyatsiz deb baholanmoqda.
