Shavkat Mirziyoyev davlat tashrifi bilan Qirg‘izistonga jo‘nab ketdi
Tashrif doirasida Markaziy Osiyo va Ozarbayjon davlat rahbarlarining norasmiy Maslahat uchrashuvi o‘tkaziladi.
Prezident Shavkat Mirziyoyev Sadir Japarovning taklifiga binoan 30-iyul kuni davlat tashrifi bilan Qirg‘izistonga jo‘nab ketdi.
Tashrif dasturiga muvofiq, Cho‘lponota shahrida O‘zbekiston va Qirg‘iziston yetakchilari o‘rtasida oliy darajadagi ikki tomonlama muzokaralar bo‘lib o‘tadi.
Shuningdek, davlat rahbarlari xalqaro va mintaqaviy kun tartibidagi dolzarb masalalar yuzasidan ham fikr almashadi.
Muzokaralar yakunida O‘zbekiston va Qirg‘iziston o‘rtasidagi ko‘p qirrali hamkorlikni yanada rivojlantirishga qaratilgan ikki tomonlama hujjatlar to‘plamini imzolash rejalashtirilgan.
Tashrif doirasida Shavkat Mirziyoyev Markaziy Osiyo va Ozarbayjon davlat rahbarlarining norasmiy Maslahat uchrashuvi hamda boshqa rasmiy tadbirlarda ham ishtirok etadi.
