Shavkat Mirziyoyev Sadir Japarovni O‘zbekistonga taklif etdi
Cho‘lponotada O‘zbekiston va Qirg‘iziston rahbarlari ishtirokida tor doiradagi va rasmiy delegatsiyalar aʼzolari ishtirokidagi muzokaralari boʻlib oʻtdi.
Qirg‘izistonning Cho‘lponota shahridagi “Ruh Ordo” madaniyat markazida Shavkat Mirziyoyev va Sadir Japarov ishtirokida tor doirada hamda rasmiy delegatsiyalar ishtirokida muzokaralar bo‘lib o‘tdi.
Uchrashuvda O‘zbekiston–Qirg‘iziston har tomonlama strategik sheriklik munosabatlarini yanada rivojlantirish, savdo-iqtisodiy, investitsiyaviy, transport-logistika, energetika va sanoat kooperatsiyasi sohalaridagi hamkorlikni kengaytirish istiqbollari muhokama qilindi.
Prezident Shavkat Mirziyoyev ikki davlat o‘rtasidagi munosabatlar bugungi kunda tarixiy yuksak bosqichga ko‘tarilganini ta’kidladi. So‘nggi yillarda o‘zaro tovar ayirboshlash hajmi qariyb 10 barobarga oshib, 2025-yil yakunlariga ko‘ra 1,2 milliard dollarga yetgani, 450 ta qo‘shma korxona faoliyat yuritayotgani qayd etildi.
Tomonlar o‘zaro savdo hajmini yaqin yillarda 2 milliard dollarga yetkazish, Toshkent va Bishkekda savdo uylari hamda vakolatxonalar ochish, energetika, geologiya, qishloq xo‘jaligi, farmatsevtika, to‘qimachilik va boshqa yo‘nalishlarda qo‘shma loyihalarni amalga oshirishga kelishib oldi.
Muzokaralarda Qambarota GES-1 qurilishi loyihasi, “Xitoy – Qirg‘iziston – O‘zbekiston” temir yo‘li qurilishi, transport-logistika infratuzilmasini rivojlantirish va ruxsat berish tartib-taomillarini raqamlashtirish masalalariga alohida e’tibor qaratildi.
Shuningdek, parlamentlar, hukumatlar, hududlar, ishbilarmon doiralar va ekspertlar darajasidagi aloqalarni faollashtirish, Davlatlararo kengash tuzish hamda joriy yil yakuniga qadar barcha viloyatlar ishtirokida birinchi Hududlar forumini o‘tkazish bo‘yicha kelishuvga erishildi.
Muzokaralar yakunida Prezident Shavkat Mirziyoyev Qirg‘iziston Prezidenti Sadir Japarovni o‘zi uchun qulay vaqtda O‘zbekistonga tashrif bilan kelishga taklif etdi.
