O‘zbekiston, Qirg‘iziston va Ozarbayjon Birinchi xonimlari “Altin balalik” reabilitatsiya markaziga tashrif buyurdi
Tashrif yakunida Qirg‘iz Respublikasi Birinchi xonimi Ziroat Mirziyoyevaga an’anaviy qirg‘iz milliy musiqa asbobi — changqo‘bizni sovg‘a qildi.
O‘zbekiston Birinchi xonimi Ziroat Mirziyoyeva Qirg‘iziston Birinchi xonimi Aygul Japarova hamda Ozarbayjon Birinchi xonimi Mehribon Aliyeva bilan birgalikda Qirg‘izistondagi “Altin balalik” reabilitatsiya markaziga tashrif buyurdi.
Tashrif davomida oliy martabali mehmonlar markaz faoliyati, bolalar uchun yaratilgan sharoitlar hamda tashkil etilgan mahorat darslari bilan tanishib, tarbiyalanuvchilar bilan muloqot qildilar.
Mehmonlar sharafiga “Shattik” milliy raqs ansambli va yosh komuzchilar jamoasi tomonidan madaniy dastur namoyish etildi. Shuningdek, “Aqilman” iqtidorli bolalar prezident litseyi tarbiyalanuvchilari tomonidan loy va kigizdan tayyorlangan ijodiy buyumlar ko‘rgazmasi tashkil etildi.
Dastur doirasida Birinchi xonimlar markazning sohil hududi hamda san’at galereyasini ham ko‘zdan kechirdilar. Galereyada Qirg‘izistonda o‘tkaziladigan bolalar ijodiyoti bo‘yicha xalqaro tanlovlar g‘oliblari, jumladan, o‘zbekistonlik yosh rassomlarning ijod namunalari namoyish etildi.
Tashrif davomida O‘zbekiston, Qirg‘iziston va Ozarbayjon xalqlari o‘rtasidagi do‘stlik ramzi sifatida yaratilgan “Do‘stlik daraxti” nomli kigiz pannosiga yakuniy bezak elementi tushirildi.
Tashrif yakunida Qirg‘iz Respublikasi Birinchi xonimi Aygul Japarova tomonidan O‘zbekiston Respublikasi Birinchi xonimi Ziroat Mirziyoyevaga qirg‘iz xalqining an’anaviy milliy musiqa asbobi — changqo‘biz sovg‘a qilindi.
