Markaziy Osiyo va Ozarbayjon yagona taraqqiyot makonini shakllantirishi zarur — Shavkat Mirziyoyev
Oʻzbekiston Prezident Markaziy Osiyo mamlakatlari va Ozarbayjonning mintaqaviy hamkorligini rivojlantirish istiqbollarini belgilab berdi
Prezident Shavkat Mirziyoyev 31-iyul kuni Qirg‘izistonning Cho‘lponota shahrida bo‘lib o‘tgan Markaziy Osiyo davlatlari va Ozarbayjon rahbarlarining norasmiy uchrashuvida ishtirok etdi.
Sammitda Ozarbayjon Prezidenti Ilhom Aliyev, Qozog‘iston Prezidenti Qasim-Jomart Toqayev, Qirg‘iziston Prezidenti Sadir Japarov, Tojikiston Prezidenti Emomali Rahmon hamda Turkmaniston Prezidenti Serdar Berdimuhamedov qatnashdi.
Davlat rahbarlari mintaqa xavfsizligi, barqaror rivojlanishi, iqtisodiy taraqqiyoti va aholi farovonligini oshirishga doir dolzarb masalalarni muhokama qildi.
Prezident Shavkat Mirziyoyev so‘zining avvalida sammitni tashkil etgani uchun Qirg‘iziston Prezidenti Sadir Japarovga, shuningdek, Markaziy Osiyo davlatlari Maslahat uchrashuvlari formatidagi samarali raisligi uchun Turkmaniston Prezidenti Serdar Berdimuhamedovga minnatdorlik bildirdi.
Davlatimiz rahbari bugungi kunda Markaziy Osiyo mamlakatlari taraqqiyotning umumiy maqsadlari yo‘lida tobora yaqinlashib borayotganini ta’kidladi. Uning qayd etishicha, Ozarbayjonning ushbu muloqot formatiga qo‘shilishi mintaqaviy hamkorlikni sifat jihatidan yangi – makromintaqaviy bosqichga olib chiqmoqda.
Prezident Markaziy Osiyo, Janubiy Kavkaz va Afg‘onistonni qamrab oluvchi yagona taraqqiyot makonini shakllantirish uchun tarixiy imkoniyat yuzaga kelganini ta’kidlab, hamkorlikni rivojlantirishning ustuvor yo‘nalishlarini ilgari surdi.
Jumladan, samarali mintaqaviy institutlarni rivojlantirish, davlat idoralari va hududlar o‘rtasidagi aloqalarni kengaytirish, uzoq muddatli qo‘shma dasturlarni amalga oshirish, savdo-iqtisodiy hamkorlikni mustahkamlash, transport-logistika tizimini rivojlantirish, sanoat kooperatsiyasi va investitsiya platformalarini kengaytirish zarurligi qayd etildi.
Shuningdek, Markaziy Osiyoni ta’lim, ilm-fan va innovatsiyalar markaziga aylantirish, sun’iy intellekt, data-markazlar hamda energetika infratuzilmasini rivojlantirish bo‘yicha hamkorlikni kuchaytirish muhimligi ta’kidlandi.
Davlatimiz rahbari ekologik xavfsizlik masalasiga ham alohida e’tibor qaratib, iqlim o‘zgarishlari iqtisodiyot, suv va energetika xavfsizligi hamda aholi salomatligiga tobora kuchli ta’sir ko‘rsatayotganini qayd etdi. Shu bois yangi tahdidlarga moslashish bo‘yicha qo‘shma yechimlarni ishlab chiqish zarurligi ta’kidlandi.
Prezident Shavkat Mirziyoyev gumanitar aloqalarni rivojlantirish hamkorlikning ustuvor yo‘nalishlaridan biri bo‘lib qolishini bildirib, xalqlar o‘rtasidagi tarixiy yaqinlik va o‘zaro ishonchni yanada mustahkamlash muhimligini qayd etdi.
Sammit yakunida Markaziy Osiyo davlatlari va Ozarbayjon rahbarlari mintaqaviy hamkorlikning istiqboldagi ustuvor yo‘nalishlarini aks ettiruvchi Cho‘lponota deklaratsiyasini qabul qildilar.
