Issiqko‘lda Markaziy Osiyoda ilk bor F1H2O jahon chempionati bosqichi boshlandi
Ochilish marosimida Markaziy Osiyo va Ozarbayjon davlat rahbarlari ishtirok etdi.
Markaziy Osiyo va Ozarbayjon davlat rahbarlari Issiqko‘lda suv-motor sporti bo‘yicha Qirg‘iziston Gran-prisining tantanali ochilish marosimida ishtirok etdi.
Norasmiy Maslahat uchrashuvi dasturi doirasida o‘tkazilgan tadbirda O‘zbekiston Prezidenti Shavkat Mirziyoyev rafiqasi bilan birga sportchilarning saralash poygasini kuzatdi.
Musobaqa Xalqaro suv-motor sporti ittifoqi shafeligida o‘tkazilayotgan va “suvdagi Formula-1” nomi bilan mashhur F1H2O jahon chempionatining ikkinchi bosqichi hisoblanadi.
Qirg‘iziston Gran-prisi Markaziy Osiyoda ilk bor mezbonlik qilayotgan F1H2O jahon chempionati bosqichi bo‘lib, unda dunyoning turli mamlakatlaridan professional jamoalar va sportchilar ishtirok etmoqda.
Musobaqa dasturidan sportchilarning mashg‘ulotlari, saralash bahslari hamda soatiga 220 kilometrdan ortiq tezlikda harakatlanuvchi tezyurar qayiqlar ishtirokidagi asosiy poyga o‘rin olgan.
