Yaponiyada noqonuniy yashagan ikki nafar O‘zbekiston fuqarosi deportatsiya qilindi
Rasmiylar xorijliklarni viza muddatiga qat’iy rioya qilishga chaqirib, noqonuniy yashash va ishlash jiddiy huquqiy oqibatlarga olib kelishi haqida ogohlantirdi.
Yaponiya Immigratsiya xizmati agentligi mamlakatda noqonuniy yashab kelgan ikki nafar O‘zbekiston fuqarosini O‘zbekistonga deportatsiya qildi.
Ma’lum qilinishicha, har ikki fuqaro Yaponiyaga qisqa muddatli viza asosida kirgan, biroq viza muddati tugaganidan keyin ham mamlakatni tark etmagan. Shundan so‘ng ular Yaponiya huquqni muhofaza qiluvchi organlari tomonidan ushlanib, deportatsiya qilingan.
Agentlikning ta’kidlashicha, noqonuniy yashash yoki ishlash holatlari aniqlangan taqdirda shaxslar hibsga olinishi, immigratsiya muassasalariga joylashtirilishi hamda deportatsiya qilinishi mumkin.
Shuningdek, Yaponiya hukumati qonunbuzarlik sodir etgan xorijiy fuqarolar haqidagi ma’lumotlarni ularning vatani hukumatiga ham taqdim etadi. Shu sababli, bunday shaxslarga nisbatan O‘zbekistonga qaytgach ham amaldagi qonunchilik doirasida tegishli choralar ko‘rilishi mumkinligi qayd etildi.
Rasmiylar fuqarolarni "Yaponiyada ishlash mumkin" kabi asossiz va noqonuniy takliflarga ishonmaslikka chaqirdi. Bundan tashqari, Yaponiya Immigratsiya xizmati qochqin maqomini olish uchun ariza berish orqali mamlakatda uzoq muddat qolish yoki ishlash mumkinligi haqidagi da’volar haqiqatga to‘g‘ri kelmasligini bildirdi.
Qayd etilishicha, bunday maqsadlarda berilgan arizalar rad etilishi, ariza beruvchi esa immigratsiya muassasasiga joylashtirilishi yoki deportatsiya qilinishi mumkin.
Agentlik, shuningdek, soxta ma’lumotlar taqdim etish yoki noqonuniy usullar bilan qochqin maqomini olishga urinish jiddiy huquqiy javobgarlikka sabab bo‘lishidan ogohlantirdi.
