Qashqadaryoda yangi qurilayotgan ko‘prik balkasi qulab tushdi
Montaj jarayonida kranning bir tomoni oldin ko‘tarilgani sabab balkaga ortiqcha yuk tushib, uning sinishiga olib kelgan. Hodisa oqibatida hech kim jabrlanmagan.
Qashqadaryo viloyati Dehqonobod tumanida qurilayotgan ko‘prik balkasi bir tomonga og‘ib ketgani aks etgan video ijtimoiy tarmoqlarda tarqaldi. Avtomobil yo‘llari davlat qo‘mitasi holat yuzasidan “Daryo”ga izoh berdi.
Ma’lum qilinishicha, hodisa 6-avgust kuni Islom taraqqiyot banki va OPEK jamg‘armasi ishtirokidagi M-39 Olmaota—Bishkek—Toshkent—Shahrisabz—Termiz avtomobil yo‘lining 1255–1315-kilometr qismini rekonstruksiya qilish loyihasi doirasidagi qurilish-montaj ishlari vaqtida yuz bergan.
Hodisa vaqtida yangi qurilayotgan ikki sathli qayrilib olish inshootining balkalari montaj qilinayotgan bo‘lgan. Qo‘mita ma’lumotiga ko‘ra, kranning bir tomoni oldin ko‘tarilgani sababli balkaga ortiqcha yuklama tushgan va natijada u singan.
Rasmiy izohda qayd etilishicha, oldindan zo‘riqtirilgan beton balkalar montaj jarayonida loyihada ko‘zda tutilmagan yuk sharoitlariga duch kelishi mumkin. Mazkur holat loyiha doirasidagi quruvchi-konsultant tashkilot tomonidan ham tasdiqlangan.
Hodisa oqibatida hech kim jabrlanmagan, atrof-muhitga ham zarar yetmagan. Quruvchi tashkilot tomonidan singan balka bo‘laklari obyekt hududidan olib chiqilgan.
Hozirda hodisaning sabablarini aniqlash bo‘yicha loyiha muhandis-maslahatchisi — Temelsu International Engineering Services Inc. mutaxassislari tomonidan o‘rganish ishlari olib borilmoqda.
