30-yil o‘tib, onaxonning yodiga tushgan hujjat: 1996-yildagi o‘lim fakti sud orqali tasdiqlandi
Sirdaryoda besh kunlik chaqaloqning 30-yil avvalgi o‘limi sudda tasdiqlandi.
Sirdaryoda onaxonning pensiya rasmiylashtirishiga 30-yil avvalgi voqea sabab to‘siq paydo bo‘ldi. Gap 1996-yilda besh kunlik bo‘lgan vaqtida vafot etgan farzandining o‘limi rasmiy qayd etilmagani haqida ketmoqda.
Oila uchun og‘ir kechgan o‘sha kunlarda chaqaloqning vafoti FHDYO organlarida rasmiylashtirilmagan. Yillar o‘tib, onaxon pensiyaga chiqish uchun hujjatlarini tayyorlay boshlaganida esa 30-yil avvalgi holat yana kun tartibiga chiqdi.
Avvaliga ona Mirzaobod tuman adliya bo‘limiga murojaat qildi. Masala bu yerda hal etilmaganidan so‘ng, fuqarolik ishlari bo‘yicha Guliston tumanlararo sudiga farzandining o‘lganlik faktini belgilash haqida ariza bilan murojaat qildi.
30-yil avvalgi voqea qanday isbotlandi?
Sud majlisida onaxonning yaqin qo‘shnilari va qarindoshlari guvoh sifatida ishtirok etdi. Ular 1996-yilda tug‘ilgan chaqaloq ko‘p yashamay, vafot etgani hamda uning dafn marosimida shaxsan ishtirok etganliklarini tasdiqladi.
Bundan tashqari, sud tomonidan tegishli arxiv va boshqa hujjatlar ham o‘rganildi. Jumladan, Mirzaobod tuman obodonlashtirish boshqarmasiga qarashli Xo‘javali qabristonidan berilgan ma’lumotnoma, FHDYO arxivi va tuman FHDYO bo‘limi tomonidan berilgan ma’lumotnomalar ish materiallariga qo‘shildi.
Fuqarolik ishlari bo‘yicha Guliston tumanlararo sudining sudyasi Muzaffar O‘rolovning aytishicha, to‘plangan dalillar, guvohlarning ko‘rsatmalari va mavjud hujjatlarni baholagan sud 1996-yil 10-sentyabrda onaxonning farzandi vafot etgani faktini belgilash haqida qaror qabul qildi.
Shu tariqa, oradan 30-yil o‘tib, bir vaqtlar rasmiylashtirilmay qolgan o‘lim fakti sud qarori bilan tasdiqlandi.
Bu holat hujjatlarni o‘z vaqtida rasmiylashtirish naqadar muhim ekanini yana bir bor ko‘rsatadi. Bir paytlar oila uchun eng og‘ir damlarda e’tibordan chetda qolgan hujjat yillar o‘tib, pensiya rasmiylashtirish kabi muhim masalada zarur dalilga aylandi.
30-yillik vaqt oralig‘i ham haqiqatni tasdiqlashga to‘sqinlik qilmadi: arxiv ma’lumotlari, qabriston hujjatlari va guvohlarning ko‘rsatmalari asosida onaxonning farzandi haqiqatdan ham vafot etgani sud tomonidan qonuniy tarzda belgilab berildi.
Mo‘tabar Nurmuhammedova
