Eron O‘zbekistonning AQSh-Isroil urushidagi pozitsiyasini olqishladi

 
Eron tashqi ishlar vaziri Abbos Aroqchi Tehronda O‘zbekiston tashqi ishlar vazirining birinchi o‘rinbosari Bahromjon Aloyev bilan uchrashuvda Toshkentning AQSh va Isroilning Eronga qarshi harbiy harakatlari yuzasidan bildirgan pozitsiyasini olqishladi. Uchrashuv 17-avgust kuni bo‘lib o‘tgan. Bu haqda Tasnim news xabar berdi.

 
Aloyev Tehronga Eron va O‘zbekiston o‘rtasidagi sakkizinchi siyosiy maslahatlashuvlarda ishtirok etish uchun borgan. Aroqchi O‘zbekistonning Eronga nisbatan tutgan pozitsiyasini “prinsipial” deb baholab, mamlakatning Eron inqilobi yetakchisi Oyatulloh Ali Xomanaiy xotirasiga bag‘ishlangan marosimga yuqori darajadagi delegatsiya yuborganini ham alohida qayd etgan.

 
Eron tashqi ishlar vaziri Tehron va Toshkent o‘rtasidagi siyosiy aloqalarni yanada rivojlantirish, o‘zaro tashrif va almashinuvlarni kengaytirish zarurligini ta’kidladi. Shuningdek, ikki davlat munosabatlaridan foydalanib, Eron va Markaziy Osiyo mamlakatlari o‘rtasidagi mintaqaviy hamkorlikni kuchaytirish muhimligini bildirgan.

 
Uning fikricha, bunday hamkorlik mintaqaviy xavfsizlikni ta’minlash, iqtisodiy va savdo aloqalarini kengaytirishga xizmat qilishi mumkin.

 
O‘z navbatida, Bahromjon Aloyev O‘zbekistonning Eron bilan o‘zaro manfaatli barcha yo‘nalishlarda keng qamrovli hamkorlikni rivojlantirishga tayyorligini bildirdi. Shuningdek, u O‘zbekiston tashqi ishlar vaziri Baxtiyor Saidovning Aroqchiga salomini yetkazgan.