Qirg‘iziston-O‘zbekiston chegarasidagi Mamay punkti qayta ochilishi mumkin
Shuningdek, Karben–Mamay avtomobil yo‘lini qurish loyihasi ham ko‘rib chiqilmoqda.
Qirg‘iziston-O‘zbekiston chegarasida 2020-yilda yopilgan Mamay nazorat-o‘tkazish punktini qayta ochish masalasi muhokama qilinmoqda. Shuningdek, Karben–Mamay avtomobil yo‘lini qurish masalasi ham xalqaro nazorat-o‘tkazish punkti loyihasi doirasida ko‘rib chiqilmoqda.
Bu haqda 18-avgust kuni Qirg‘iziston prezidentining maxsus topshiriqlar bo‘yicha maxsus vakili Bakit Torobayev ma’lum qildi.
Uning ta’kidlashicha, punktning qayta ochilishi ikki davlatning chegaradosh hududlari o‘rtasidagi savdo-iqtisodiy va turizm aloqalarini rivojlantirishga xizmat qiladi.
Torobayevga ko‘ra, nazorat-o‘tkazish punkti ishga tushirilsa, mahalliy aholi mahsulotlarini qo‘shni davlatga eksport qilish imkoniyatiga ega bo‘ladi. Shuningdek, Padish-Ota, Sari-Chelek va Qora-Qamish kabi turistik maskanlarga sayyohlar oqimini oshirish hamda hududdagi iqtisodiy faollikni kuchaytirish kutilmoqda.
Mamay nazorat-o‘tkazish punkti 2020-yilda yopilgan. So‘nggi yillarda Qirg‘iziston parlamenti deputatlari uni qayta ochish masalasini bir necha bor ko‘targan.
Ma’lumot uchun, 2026-yil iyul oyida Qirg‘iziston va O‘zbekiston chegara o‘tish punktlari sonini 15 tadan 30 tagacha oshirishga kelishib olgan. Shuningdek, O‘zbekiston fuqarolariga Qirg‘izistonda 15 kungacha ro‘yxatdan o‘tmasdan qolish imkoniyati berilgan.
