Navoiyda uyga bostirib kirib, qizni bog‘lab qo'ygan erkak 15 yilga qamaldi
U bundan avval ham turli jinoyatlar uchun javobgarlikka tortilgan va xavfli retsidivist deb qayd etilgan.
Navoiy viloyatining Karmana tumanida bosqinchilik jinoyatini sodir etgan, ilgari ham jinoyat uchun javobgarlikka tortilgan shaxsga nisbatan sud hukmi chiqarildi. Bu haqda Oliy sud matbuot xizmati ma’lum qildi.
Sudda aniqlanishicha, sudlanuvchi 2024-yil aprel oyida Karmana tumani Kalavot mahallasidagi xonadonlardan biriga yuziga oq doka niqob taqib, qo‘lida oshxona pichog‘i bilan noqonuniy ravishda kirgan.
U xonadon yotoqxonasida bo‘lgan yosh qizga hayoti va sog‘lig‘i uchun xavfli bo‘lgan zo‘rlik ishlatgan. Jabrlanuvchi qarshilik ko‘rsatganidan so‘ng, uning qo‘l va oyoqlarini xonadagi charm tasma yordamida bog‘lab, pichoq bilan qo‘rqitgan.
Shundan so‘ng sudlanuvchi xonadondagi tilla va boshqa taqinchoqlarni olib, voqea joyidan qochgan.
Tezkor-qidiruv tadbirlari natijasida u hodisadan bir kun o‘tib qo‘lga olingan.
Sudlanuvchi bundan avval ham turli jinoyatlar uchun javobgarlikka tortilgani va xavfli retsidivist ekani qayd etilgan.
U Jinoyat kodeksining 164-moddasi 4-qismi “d” bandida nazarda tutilgan jinoyatni sodir etishda aybli deb topilgan va 15 yil muddatga ozodlikdan mahrum qilish jazosi tayinlangan.
