Ilhom Aliyev 23–24-avgust kunlari O‘zbekistonda bo‘ladi
Tashrif doirasida oliy darajadagi muzokaralar va Oliy davlatlararo kengashning uchinchi yig‘ilishi o‘tkaziladi.
Prezident Shavkat Mirziyoyevning taklifiga binoan Ozarbayjon Prezidenti Ilhom Aliyev 23–24-avgust kunlari O‘zbekistonga davlat tashrifi bilan keladi.
Tashrif doirasida Toshkent shahrida O‘zbekiston va Ozarbayjon prezidentlarining oliy darajadagi muzokaralari hamda ikki davlat rahbarlari raisligida Oliy davlatlararo kengashning uchinchi yig‘ilishi o‘tkazilishi rejalashtirilgan.
Muzokaralar kun tartibidan O‘zbekiston va Ozarbayjon o‘rtasidagi strategik sheriklik va ittifoqchilik munosabatlarini yanada rivojlantirish va kengaytirish masalalari o‘rin oladi.
Shuningdek, tomonlar o‘zaro tovar ayirboshlash hajmini oshirish, ishbilarmon doiralar va hududlar o‘rtasidagi hamkorlikni chuqurlashtirish, transport-tranzit imkoniyatlaridan samarali foydalanish hamda madaniy-gumanitar aloqalarni rivojlantirish masalalarini muhokama qiladi.
Davlat rahbarlari xalqaro va mintaqaviy siyosatning dolzarb masalalari, shuningdek, ko‘p tomonlama tashkilotlar doirasidagi hamkorlik yuzasidan fikr almashishi kutilmoqda.
Tashrif yakunida ikki tomonlama salmoqli hujjatlar to‘plamini imzolash, shuningdek, qator yangi iqtisodiy va gumanitar loyihalarni ishga tushirish ko‘zda tutilgan.
Ayni kunlarda O‘zbekistonda ikki mamlakat hududlari forumi va boshqa qo‘shma tadbirlar ham o‘tkazilmoqda.
