Shavkat Mirziyoyev va Qosim-Jomart Toqayev telefon orqali muloqot qildi
O‘zbekiston rahbari Toqayevni Qozog‘iston tarixida ilk bor bir palatali Qurultoyga saylov muvaffaqiyatli o‘tkazilgani bilan tabrikladi.
O‘zbekiston Prezidenti Shavkat Mirziyoyev Qozog‘iston Prezidenti Qosim-Jomart Toqayev bilan telefon orqali muloqot qildi.
Suhbat avvalida Shavkat Mirziyoyev Qosim-Jomart Toqayevni Qozog‘iston tarixida ilk bor bir palatali Qurultoyga saylov muvaffaqiyatli o‘tkazilgani bilan samimiy tabrikladi.
Davlat rahbari yangi Qurultoy Qozog‘istonda amalga oshirilayotgan izchil islohotlarni yanada ilgari surish, keng ko‘lamli o‘zgarishlarni qonunchilik jihatidan samarali ta’minlash hamda mamlakatning barqaror rivojlanishiga yangi sur’at bag‘ishlashiga ishonch bildirdi.
Muloqot davomida O‘zbekiston va Qozog‘iston o‘rtasidagi strategik sheriklik va ittifoqchilik munosabatlari jadal rivojlanayotgani mamnuniyat bilan qayd etildi.
Shuningdek, o‘zaro savdo hajmini oshirish, sanoat kooperatsiyasini kengaytirish, qo‘shma investitsiya loyihalarini amalga oshirish, transport-logistika aloqalarini rivojlantirish hamda ikki mamlakat hududlari o‘rtasidagi ishbilarmonlik aloqalarini faollashtirish masalalari muhokama qilindi.
Yetakchilar mintaqaviy va xalqaro kun tartibidagi dolzarb masalalar yuzasidan ham fikr almashdilar.
