Shavkat Mirziyoyev AQSh Kongressi Vakillar palatasi delegatsiyasini qabul qildi
Uchrashuv yakunida ikki mamlakat ishbilarmonlik missiyalarining o‘zaro tashriflarini tashkil etishga kelishib olindi.
Shavkat Mirziyoyev AQSh Kongressi Vakillar palatasining kongressmenlar Jeyson Smit, Greg Merfi, Ronni Jekson va Edvard Keysdan iborat delegatsiyasini qabul qildi.
Uchrashuv avvalida amerikalik kongressmenlar O‘zbekiston Prezidenti va xalqini mamlakatimiz Mustaqilligining 35 yilligi bilan samimiy tabrikladilar.
Muloqotda O‘zbekiston va AQSh o‘rtasidagi strategik sheriklik munosabatlarini yanada mustahkamlash hamda parlamentlararo hamkorlikni rivojlantirish masalalari ko‘rib chiqildi.
Ikki tomonlama munosabatlarda ijobiy sur’at kuzatilayotgani, siyosiy muloqot yuqori darajada ekani, aloqalar va o‘zaro tashriflar faollashgani mamnuniyat bilan qayd etildi. Ikki mamlakat yetakchilari yaqinda bo‘lib o‘tgan telefon orqali muloqot chog‘ida strategik sheriklikni yanada kengaytirishning ustuvor yo‘nalishlarini belgilab oldilar.
Savdo-iqtisodiy hamkorlikni rivojlantirishga alohida e’tibor qaratildi. Joriy yil boshidan O‘zbekiston va AQSh o‘rtasidagi o‘zaro savdo hajmi 20 foizga oshgani qayd etildi.
Energetika, muhim minerallar, transport, qishloq xo‘jaligi, raqamli texnologiyalar va sanoat sohalaridagi yirik loyihalarni nazarda tutuvchi uch yillik Iqtisodiy hamkorlik dasturini izchil amalga oshirish masalalari ko‘rib chiqildi.
O‘zbekistonda amalga oshirilayotgan keng ko‘lamli islohotlarni qo‘llab-quvvatlash hamda ikki mamlakat o‘rtasidagi konstruktiv va o‘zaro manfaatli muloqotni rivojlantirishda AQSh Kongressining muhim o‘rni qayd etildi.
Shuningdek, AQShning Missuri, Shimoliy Karolina, Texas va Gavayi shtatlari bilan to‘g‘ridan-to‘g‘ri hududlararo aloqalarni kengaytirish va qo‘shma loyihalarni amalga oshirishga tayyorlik bildirildi.
Muloqot davomida mintaqaviy va xalqaro ahamiyatga molik dolzarb masalalar yuzasidan ham fikr almashildi.
Uchrashuv yakunida ikki mamlakat ishbilarmon doiralari o‘rtasidagi aloqalarni rivojlantirish maqsadida ishbilarmonlik missiyalarining o‘zaro tashriflarini tashkil etishga kelishib olindi.
