Shavkat Mirziyoyev BMT Bosh kotibi Antoniu Guterrish bilan uchrashdi
BMT va uning institutlari bilan hamkorlikni yanada kengaytirish va mustahkamlash masalalari muhokama qilindi.
O‘zbekiston Prezidenti Shavkat Mirziyoyev Bishkek shahrida o‘tayotgan Shanxay hamkorlik tashkiloti sammiti doirasida BMT Bosh kotibi Antoniu Guterrish bilan uchrashdi.
Uchrashuv avvalida Antoniu Guterrish Shavkat Mirziyoyev va O‘zbekiston xalqini mamlakat mustaqilligining 35 yilligi bilan tabriklab, tinchlik-osoyishtalik, farovonlik va ravnaq tiladi.
Muzokaralarda O‘zbekiston, BMT hamda uning institutlari o‘rtasidagi ko‘p qirrali hamkorlikni yanada kengaytirish masalalari muhokama qilindi.
Shavkat Mirziyoyev Antoniu Guterrishning O‘zbekiston-BMT munosabatlarini rivojlantirishga qo‘shayotgan hissasini yuqori baholab, BMT tizimini isloh qilishga qaratilgan tashabbuslarini qo‘llab-quvvatlashini bildirdi.
Faol muloqot va o‘zaro tashriflar hamda O‘zbekistonning BMTning saylanadigan organlari faoliyatidagi ishtiroki kengayib borayotgani mamnuniyat bilan qayd etildi. So‘nggi yillarda mamlakatimiz tashabbusi bilan BMT Bosh Assambleyasining 15 ta rezolyutsiyasi qabul qilindi.
BMT Bosh kotibi O‘zbekistonning Barqaror rivojlanish maqsadlarini amalga oshirish borasidagi yutuqlarini olqishladi. Ushbu yo‘nalishdagi hamkorlikni yanada faollashtirishga tayyorlik bildirildi.
Uchrashuv davomida xalqaro va mintaqaviy kun tartibidagi dolzarb masalalar yuzasidan fikr almashildi. Shuningdek, bo‘lajak qo‘shma tadbirlar rejasi ko‘rib chiqildi.
