O‘zbekiston Prezidenti “ShHT plyus” formati va BMT o‘rtasidagi hamkorlik istiqbollarini ko‘rsatdi
Shavkat Mirziyoyev “SHHT plyus” formati doirasida mintaqalararo hamkorlikni kuchaytirishga qaratilgan bir qator tashabbuslarni ilgari surdi.
Shavkat Mirziyoyev “ShHT plyus” formatini mintaqalararo muloqot maydoni sifatida rivojlantirishni taklif qildi. Unda barqaror o‘sish, yuqori texnologiyalarni joriy etish, iqlim o‘zgarishiga moslashish, inson kapitali, ta’lim va yoshlarni qo‘llab-quvvatlash masalalariga e’tibor qaratish zarurligi ta’kidlandi.
Shuningdek, “ShHT plyus” doirasida mintaqaviy tashkilotlarning Hamkorlik tarmog‘ini yaratish, BMTning Barqaror rivojlanish maqsadlariga erishishda ular salohiyatidan faolroq foydalanish taklif etildi.
Prezident tabiatdan foydalanish, “yashil” energetika, raqamli xizmatlar va sog‘liqni saqlash sohalarida mintaqalararo loyihalar va texnologiyalarning Ochiq bankini shakllantirishni taklif qildi.
Iqtisodiy hamkorlikni kuchaytirish maqsadida “ShHT Invest” forumiga doimiy faoliyat yurituvchi platforma maqomini berish tashabbusi ilgari surildi.
Madaniy-gumanitar sohada esa “ShHT plyus” madaniyatlar va sivilizatsiyalar doimiy forumini ta’sis etish hamda uni Xiva shahrida o‘tkazish taklif qilindi.
