Ohangaron tumanida avtobus va Lacetti to‘qnashdi
Lacetti haydovchisi va 2 nafar avtobus yo‘lovchisi shifoxonaga olib ketilgan.
Toshkent viloyati Ohangaron tumanida yo‘l-transport hodisasi sodir bo‘ldi. Bu haqda viloyat IIBB YHXB xabar berdi.
2-sentyabr kuni soat taxminan 18:30 larda A373 “Toshkent–O‘sh” avtomobil yo‘lining 75-kilometrida 1964-yilda tug‘ilgan haydovchi boshqaruvidagi “Isuzu” rusumli avtobus qayrilib olish mumkin bo‘lgan joydan burilayotgan vaqtida qarama-qarshi yo‘nalishda harakatlanayotgan 1997-yilda tug‘ilgan haydovchi boshqaruvidagi “Lacetti” avtomobili bilan to‘qnashgan.
Hodisa oqibatida “Lacetti” haydovchisi hamda avtobusdagi ikki nafar yo‘lovchi shifoxonaga olib ketilgan.
Holat yuzasidan Ohangaron tumani IIB tomonidan surishtiruv ishlari olib borilmoqda.
