Shavkat Mirziyoyev yosh parlament a’zolariga murojaat yo‘lladi

 

Prezident Shavkat Mirziyoyev Parlamentlararo Ittifoqning XII Yosh parlament a’zolari butunjahon konferensiyasi ishtirokchilariga murojaat yo‘lladi.

 

Davlat rahbari yosh parlamentariylarni nufuzli anjuman munosabati bilan samimiy qutlab, “Ming yillardan buyon tamaddunlar, xalqlar va gʻoyalarni birlashtirayotgan koʻprik – koʻhna va navqiron Samarqand shahriga xush kelibsiz!”, – deya ta'kidlagan.

 

Prezident mazkur konferensiyaning O‘zbekistonda ilk bor o‘tkazilayotganini Yangi O‘zbekistonda amalga oshirilayotgan demokratik islohotlarga xalqaro hamjamiyat tomonidan berilayotgan yuksak bahoning ifodasi sifatida qayd etdi.

 

Anjuman dunyoda global ziddiyatlar, beqarorlik va qurolli mojarolar kuchayib borayotgan murakkab sharoitda o‘tkazilayotgani ta’kidlandi. Shu nuqtayi nazardan “Notinch davrlarda barcha uchun inson huquqlari, adolat va qadr-qimmatni tiklash” mavzusi dolzarb ekani qayd etildi.

 

Murojaatda bugungi kunda 500 milliondan ziyod bolalar va yoshlar qurolli mojarolar hududlarida yashayotgani, ko‘plab yoshlarning ta’lim olish imkonidan mahrum ekani qayd etildi.

 

Shavkat Mirziyoyev O‘zbekistonda yosh avlodni qo‘llab-quvvatlash davlat siyosatining ustuvor yo‘nalishlaridan biri ekanini ta’kidladi. “O‘zbekiston – 2030” strategiyasida yoshlarning bilim va salohiyatini to‘liq ro‘yobga chiqarish uchun zarur sharoitlar yaratish belgilangan.

 

Qayd etilishicha, 39 millionlik aholining qariyb 56 foizini yoshlar tashkil etadi. So‘nggi yillarda yoshlarning ta’lim olishi, ilmiy faoliyat bilan shug‘ullanishi va tadbirkorlik bilan band bo‘lishi uchun keng imkoniyatlar yaratilgan.

 

Jumladan, dunyoning eng yaxshi 100 taligiga kiruvchi oliy ta’lim muassasalarida tahsil olayotgan o‘zbekistonlik yoshlar soni 3,5 ming nafardan oshgan, ilmiy darajaga ega yosh olimlar ulushi ikki baravar ko‘paygan. Yoshlarning tadbirkorlar safidagi ulushi esa 35 foizga yetgan.

 

Oliy Majlis Qonunchilik palatasi va Senati huzuridagi Yoshlar parlamentlari bo‘lajak xalq vakillari uchun tajriba maktabiga aylangani ta’kidlandi. 2024-yilgi saylovlarda 200 ga yaqin yoshning vakillik organlari a’zosi etib saylangani siyosiy hayotdagi yangilanishlarning muhim natijasi sifatida qayd etildi.

 

Prezident O‘zbekistonning yoshlar siyosati xalqaro miqyosda ham e’tirof etilayotganini ta’kidlab, mamlakat BMTning “Yoshlar – 2030” strategiyasini jadal amalga oshirayotgan yetakchi davlatlar qatoridan joy olganini qayd etdi.

 

Shuningdek, Parlamentlararo Ittifoq doirasida qabul qilinayotgan Yoshlar va kelajak avlodlar to‘g‘risidagi Samarqand rezolyutsiyasi olqishlandi.

 

Shavkat Mirziyoyev O‘zbekiston yoshlar salohiyatini ro‘yobga chiqarish borasidagi ilg‘or tajribasi bilan o‘rtoqlashish uchun maxsus platforma taqdim etishga tayyorligini bildirdi.

 

Davlatimiz rahbari barcha ishtirokchilarni kelgusi yili O‘zbekistonda o‘tkaziladigan “Avlodlar muloqoti” xalqaro yoshlar kongressida ishtirok etishga taklif etdi.

 

Murojaat yakunida Prezident Samarqanddagi muloqot va munozaralar ochiq va konstruktiv ruhda o‘tishiga, anjuman doirasida qabul qilinadigan hujjatlar global tinchlik va hamkorlikni mustahkamlashga xizmat qilishiga ishonch bildirdi.