Markaziy Osiyo davlatlari prezidentlari Seulda uchrashadi
16 sentyabr kuni Seulda Janubiy Koreya va Markaziy Osiyoning besh davlati rahbarlari ishtirokida ilk sammit o‘tkaziladi.
Janubiy Koreya prezidenti Li Je Myon Markaziy Osiyoning besh davlati rahbarlari ishtirokidagi mazkur sammitni o‘tkazadi. Bu haqda Reuters xabar berdi.
Sammitda O‘zbekiston, Qozog‘iston, Qirg‘iziston, Tojikiston va Turkmaniston rahbarlari ishtirok etadi. Uchrashuvda savdo, investitsiyalar, energetika, muhim foydali qazilmalar va taʼminot zanjirlari sohalaridagi hamkorlikni kengaytirish masalalari muhokama qilinadi.
Janubiy Koreya prezidenti sammit oldidan, 14–16 sentyabr kunlari Markaziy Osiyoning har bir davlati rahbari bilan alohida ikki tomonlama uchrashuvlar ham o‘tkazadi.
Li Je Myonning taʼkidlashicha, sammit Janubiy Koreya va Markaziy Osiyo o‘rtasidagi munosabatlarni davlat rahbarlari darajasidagi ko‘p tomonlama hamkorlik tizimiga olib chiqishga xizmat qiladi. Seul bu orqali mintaqa bilan iqtisodiy va strategik aloqalarni yana-da mustahkamlashni ko‘zlamoqda.
Janubiy Koreya Tashqi ishlar vazirligi maʼlumotlariga ko‘ra, sammit 16–17 sentyabr kunlari o‘tkaziladi. Tomonlar tayyorgarlik jarayonida kelgusidagi hamkorlik yo‘nalishlari hamda sammit yakunlari bo‘yicha hujjatlarni muhokama qilgan.
Sammit Seulning Markaziy Osiyo bilan iqtisodiy, energetika va infratuzilma sohalaridagi aloqalarni rivojlantirishga qaratilgan siyosati doirasidagi muhim tadbirlardan biri sifatida baholanmoqda.
