O‘zbekiston va Koreya biznesi: sanoat-texnologik alyans tuzish taklif qilindi

 

Shavkat Mirziyoyev va Koreya Respublikasi Bosh vaziri Xan Son Suk O‘zbekiston–Koreya qo‘shma biznes forumining ochilishida ishtirok etdi. Tadbirda ikki davlatning davlat idoralari va biznes doiralaridan 300 nafardan ortiq vakil qatnashdi.

 

Forumda yetakchi moliya institutlari, yirik sanoat korxonalari va savdo kompaniyalari rahbarlari, jumladan, Koreyaning “Lotte Chemical”, “Hyundai Motor Group”, “Samsung C&T”, “CJ Group”, “Shinhan Financial Group”, “Hyundai Rotem”, “KIND”, “BOMI”, “Kia Corporation”, “Sampyo Group” va “Hansae Mobility” kabi kompaniyalari vakillari ishtirok etdi.

 

Prezident Shavkat Mirziyoyev Koreyani O‘zbekistonning vaqt sinovidan o‘tgan do‘sti va alohida strategik sherigi sifatida qayd etib, savdo-iqtisodiy hamda investitsiyaviy aloqalar ikki davlat ko‘p qirrali hamkorligining ustuvor yo‘nalishlaridan ekanini ta’kidladi.

 

Koreyaning yetakchi kompaniyalari O‘zbekistonda samarali faoliyat yuritib, mamlakat iqtisodiyotining rivojiga munosib hissa qo‘shayotgani qayd etildi. Shu bilan birga, O‘zbekistonning industrial va texnologik taraqqiyotida yangi bosqich boshlanayotgani, bu esa savdo va investitsiyalarni kengaytirish hamda yangi qo‘shma loyihalarni amalga oshirish uchun qo‘shimcha imkoniyatlar yaratishi ta’kidlandi.

 

Davlat rahbari O‘zbekistonning resurs salohiyati, Koreyaning ilg‘or texnologiyalari va ikki mamlakat kompaniyalarining investitsiyaviy imkoniyatlarini birlashtirish orqali yangi iqtisodiy o‘sish nuqtalarini shakllantirishni taklif etdi.

 

Kelgusidagi hamkorlikning ustuvor yo‘nalishlari sifatida sanoat kooperatsiyasi va to‘liq ishlab chiqarish zanjirlarini yaratish, energetika va “yashil iqtisodiyot”, transport hamda zamonaviy infratuzilma, raqamlashtirish va sun’iy intellekt, yarimo‘tkazgichlar va mikroelektronika, biotexnologiya va farmatsevtika, ilmiy tadqiqotlar, ilg‘or texnologiyalarni joriy etish hamda kadrlar tayyorlash sohalari ko‘rsatib o‘tildi.

 

Koreya kompaniyalari misni chuqur qayta ishlash, elektrotexnika mahsulotlari ishlab chiqarish, avtomobil va elektromobil sanoati uchun butlovchi qismlarni mahalliylashtirish, robototexnika va avtomatlashtirish, biotexnologiya va farmatsevtika, gidroenergetika, energiya saqlash tizimlari, energetika infratuzilmasini modernizatsiya qilish, transport va shahar infratuzilmasini rivojlantirish bo‘yicha loyihalarda ishtirok etishga taklif qilindi.

 

Sanoat va texnologik hamkorlikni yangi bosqichga olib chiqish maqsadida O‘zbekiston–Koreya sanoat-texnologik alyansini tashkil etish taklifi ilgari surildi.

 

Prezident O‘zbekistonda koreys biznesi uchun yanada qulay shart-sharoitlar yaratish hamda qo‘shma loyihalarni amalga oshirishga amaliy ko‘mak ko‘rsatishga tayyor ekanini bildirdi.