Shavkat Mirziyoyev Koreya Eksimbanki raisi bilan uchrashdi
Tomonlar 8 milliard dollarlik yangi hamkorlik dasturini amalga oshirish, yuqori tezlikdagi poyezdlar, muhim minerallar, tibbiyot va raqamli texnologiyalar bo‘yicha loyihalarni muhokama qildi.
Shavkat Mirziyoyev Koreya Respublikasiga davlat tashrifi doirasida Koreya Eksport-import banki raisi Xvan Ki Yon bilan uchrashuv oʻtkazdi.
Uchrashuvda Koreya Geologiya va mineral resurslar instituti (KIGAM) prezidenti Kvon I Gyun va Koreya Materialshunoslik instituti (KIRAM) direktori o‘rinbosari Bum Sun Kim ham ishtirok etdi.
Tomonlar sog‘liqni saqlash, farmatsevtika, muhim materiallar, ta’lim va transport sohalarida Koreya Eksimbanki hamda uning jamg‘armalari bilan ko‘p yillik samarali hamkorlik yo‘lga qo‘yilganini mamnuniyat bilan qayd etdilar.
Davlat rahbari 8 milliard dollarlik yangi hamkorlik dasturini imzolashni qo‘llab-quvvatladi. Mazkur dastur doirasida yuqori tezlikda harakatlanuvchi poyezdlarni yetkazib berish, Biomarkaz tashkil etish, muhim minerallarni qayta ishlash hamda raqamli texnologiyalarni rivojlantirishga qaratilgan loyihalarni jadallashtirish masalalari ko‘rib chiqildi.
Shuningdek, Orolbo‘yi hududida Xotin-qizlar tadbirkorligi markazini tashkil etish va Toshkent – Samarqand yo‘nalishida yangi temir yo‘l qurilishi loyihasiga Koreyaning moliya institutlari hamda kompaniyalarini jalb qilish bo‘yicha takliflar muhokama qilindi.
Strategik ahamiyatga ega muhim minerallar sohasidagi loyihalarni moliyalashtirish uchun qo‘shma jamg‘arma ishga tushirilgani qayd etildi.
Uchrashuvda yarimo‘tkazgichlar va yangi materiallarni ishlab chiqish hamda sinovdan o‘tkazish markazini tashkil etish imkoniyatlarini o‘rganish taklif qilindi.
Mazkur yo‘nalishlardagi loyihalarda Koreya Geologiya va mineral resurslar instituti hamda Koreya Nodir metallar institutining faol ishtirokini ta’minlash muhimligi ta’kidlandi.
