Shavkat Mirziyoyev Koreya Respublikasi Bosh vaziri bilan uchrashdi
Uchrashuvda raqamli iqtisodiyot, kiberxavfsizlik, muhim minerallarni qayta ishlash va transport infratuzilmasi ustuvor yo‘nalishlar sifatida qayd etildi.
Shavkat Mirziyoyev Koreya Respublikasi Bosh vaziri Xan Son Suk bilan uchrashdi. Muloqotda ikki davlat o‘rtasidagi alohida strategik sheriklikni yanada rivojlantirish masalalari muhokama qilindi.
Seul shahridagi Prezident uchun ajratilgan qarorgohda bo‘lib o‘tgan uchrashuvda savdo-iqtisodiy va investitsiyaviy hamkorlikni kengaytirish, texnologiyalarni rivojlantirish hamda transport-logistika sohalaridagi sheriklikni mustahkamlash istiqbollari ko‘rib chiqildi.
Tomonlar innovatsion-texnologik hamkorlikni chuqurlashtirishga alohida e’tibor qaratdi.
Xususan, savdo, moliya va investitsiyalar, raqamli iqtisodiyot hamda kiberxavfsizlik yo‘nalishlarida hamkorlikni rivojlantirish masalalari yuzasidan fikr almashildi.
Shuningdek, Koreyaning ilg‘or texnologiyalari va O‘zbekistonning xomashyo salohiyatidan foydalanib, muhim minerallarni qayta ishlash, transport va temir yo‘l infratuzilmasini rivojlantirish hamda hududlararo aloqalarni kengaytirish bo‘yicha sheriklik istiqbollari muhokama qilindi.
