Shavkat Mirziyoyev Koreya Respublikasi Milliy Assambleyasi Spikeri bilan uchrashdi
Uchrashuvda 2027-yilda diplomatik munosabatlarning 35-yilligi munosabati bilan qo‘shma parlament tadbirlari o‘tkazishga kelishildi.
Prezident Shavkat Mirziyoyev 15-sentabr kuni Koreya Respublikasiga davlat tashrifi doirasida Milliy Assambleya Spikeri Cho Chjon Shik bilan uchrashdi.
Muloqotda O‘zbekiston va Koreya o‘rtasidagi alohida strategik sheriklikni yanada rivojlantirishda parlamentlararo aloqalarning muhim o‘rni qayd etildi.
Tomonlar parlamentlar o‘rtasidagi “do‘stlik guruhlari” faoliyatini kuchaytirish, delegatsiyalar almashinuvini davom ettirish hamda qonun chiqaruvchi organlarning tegishli qo‘mitalari o‘rtasida tajriba almashinuvini kengaytirish masalalarini muhokama qildilar.
Shuningdek,Milliy Assambleya va Koreya xalqaro hamkorlik agentligi ko‘magida O‘zbekiston Oliy Majlisining har ikki palatasida amalga oshirilayotgan “Elektron parlament” loyihasi ham alohida ta’kidlandi.
Oliy darajada erishilgan savdo-iqtisodiy, investitsiyaviy va madaniy-gumanitar kelishuvlarning amaliy ijrosini parlament monitoringi orqali ta’minlash bo‘yicha hamkorlik mexanizmini yaratish zarurligi bildirildi.
Uchrashuv yakunida 2027-yilda O‘zbekiston va Koreya o‘rtasida diplomatik munosabatlar o‘rnatilganining 35-yilligi munosabati bilan parlament diplomatiyasi doirasida qator qo‘shma tadbirlarni tashkil etish bo‘yicha kelishuvga erishildi.
