Eronga qarshi urush: AQSH Kongressi Eronga qarshi harbiy amaliyotlarni to‘xtatishga chaqirdi
AQSH Vakillar palatasi harbiy amaliyotlarni Kongress roziligisiz davom ettirishni cheklashga chaqiruvchi rezolyutsiyani 220 ovoz bilan maʼqulladi.
AQSH Vakillar palatasi prezident Donald Tramp maʼmuriyatining Eronga qarshi harbiy amaliyotlarini Kongressning maxsus roziligisiz davom ettirishni cheklashga qaratilgan rezolyutsiyani maʼqulladi. Bu haqda AP xabar berdi.
Rezolyutsiya uchun 220 nafar kongressmen ovoz bergan, 204 nafari qarshi chiqqan. Hujjatni barcha demokratlar hamda yetti nafar respublikachi qo‘llab-quvvatlagan. Bu Vakillar palatasining Eronga qarshi harbiy harakatlarni cheklash bo‘yicha uchinchi ovoz berishi bo‘lgan.
Rezolyutsiya Urush vakolatlari to‘g‘risidagi qonunga asoslangan bo‘lib, Kongress tomonidan alohida ruxsat berilmagan taqdirda AQSH harbiy kuchlarining Eronga qarshi jangovar amaliyotlarda ishtirokini to‘xtatishni nazarda tutadi.
AQSH Konstitutsiyasiga ko‘ra, urush eʼlon qilish vakolati Kongressga tegishli. Shu bilan birga, prezident bosh qo‘mondon sifatida ayrim harbiy operatsiyalarni amalga oshirish vakolatiga ega. Urush vakolatlari to‘g‘risidagi qonun esa prezidentning harbiy kuchlardan foydalanish vakolatlarini Kongress nazorati bilan cheklashga qaratilgan.
Biroq avvalgi shunga o‘xshash rezolyutsiyalar kabi mazkur hujjat ham prezidentga yuborilmagan. AP maʼlumotiga ko‘ra, Tramp maʼmuriyati ushbu tashabbusga qarshi chiqmoqda.
