6 ta jamoa, 6 ta g‘alaba: O‘zbekiston shaxmat Olimpiadasini muvaffaqiyatli boshladi
O‘zbekistonning erkaklar jamoalari Yamayka, Afg‘oniston va Mali ustidan, ayollar jamoalari esa Trinidad va Tobago, Togo hamda Tanzaniya ustidan g‘alaba qozondi.
16-sentabr kuni Samarqandda 46-Butunjahon shaxmat Olimpiadasining 1-tur bahslari o‘tkazildi. Musobaqada O‘zbekiston mezbon davlat sifatida erkaklar va ayollar o‘rtasidagi turnirlarda uchta jamoa bilan ishtirok etmoqda.
Birinchi turda O‘zbekistonning erkaklar o‘rtasidagi asosiy jamoasi Yamaykani 4:0 hisobida mag‘lub etdi. Birinchi taxtada Nodirbek Abdusattorov, keyingi taxtalarda Nodirbek Yoqubboyev, Shamsiddin Vohidov va Muhiddin Madaminov raqiblarini mag‘lub etdi.
O‘zbekiston terma jamoasi yetakchisi Javohir Sindarov esa dastlabki turda dam oldi.
O‘zbekiston-2 jamoasi Afg‘onistonni 3:1, O‘zbekiston-3 esa Malini 3,5:0,5 hisobida mag‘lub etdi.
O‘zbekistonning asosiy ayollar terma jamoasi Trinidad va Tobagoni 4:0 hisobida mag‘lub etdi. Birinchi taxtada Gulruhbegim Tohirjonova, keyingi taxtalarda Nilufarxon Imomquziyeva, Guldona Karimova va Umida Omonova raqiblaridan ustun keldi.
O‘zbekiston-2 ayollar jamoasi Togo ustidan 3:1, O‘zbekiston-3 esa Tanzaniya ustidan 4:0 hisobida g‘alaba qozondi.
Shu tariqa, O‘zbekistonning musobaqada qatnashayotgan barcha 6 ta jamoasi birinchi turni g‘alaba bilan yakunladi.
Turnirda birinchi raqam ostida saralangan va asosiy favoritlardan biri hisoblangan AQSh terma jamoasi Iroqni 3,5:0,5 hisobida mag‘lub etdi.
Amaldagi Olimpiada chempioni, ikkinchi raqam ostida saralangan Hindiston esa Tailand ustidan 3:1 hisobida g‘alaba qozondi.
Musobaqaning 2-tur bahslari 17-sentabr kuni o‘tkaziladi.
46-Butunjahon shaxmat Olimpiadasi Samarqandda 27-sentabrga qadar davom etadi.
