Dirijabl, favvora va osmono‘par binolardagi bayroq: Shavkat Mirziyoyevning Koreyaga tashrifi tafsilotlari
Prezident Shavkat Mirziyoyev Koreyadagi tashrifi davomida mintaqa davlatlari rahbarlari va koreyalik hamkorlar bilan uchrashdi. Sammit arafasida “Mirziyoyev doktrinasi” kitobining koreys tilidagi nashriga dastxat yozib berdi.
Prezident Shavkat Mirziyoyevning Janubiy Koreyaga davlat tashrifi do‘stona uchrashuv va muloqotlarga boy bo‘ldi. Birinchi “Markaziy Osiyo – Koreya Respublikasi” sammiti doirasida davlat rahbari mintaqa mamlakatlari prezidentlari bilan uchrashib, ikki tomonlama munosabatlar va hamkorlikni rivojlantirishning istiqbolli yo‘nalishlarini muhokama qildi.
Tashrif davomida Prezidentning Koreya Respublikasining O‘zbekistondagi sobiq elchisi Li Uk Xyon bilan uchrashuvi ham bo‘lib o‘tdi. Suhbatda O‘zbekiston–Koreya do‘stona munosabatlarini mustahkamlash yo‘lida o‘tgan yillarda amalga oshirilgan ishlar va hamkorlik tajribasi yodga olindi.
Sammit arafasida Shavkat Mirziyoyev Janubiy Koreya Milliy Assambleyasi Spikeri uchun koreys tiliga tarjima qilingan “Mirziyoyev doktrinasi” kitobiga dastxat yozib berdi.
Tashrif doirasida O‘zbekiston va Janubiy Koreya o‘rtasidagi do‘stona munosabatlar hamda o‘zaro hurmatni aks ettiruvchi qator tadbirlar ham tashkil etildi.
Jumladan, Janubiy Koreyadagi eng baland bino — Lotte World Tower hamda Seul teleminorasida O‘zbekiston bayrog‘i namoyish etildi. Prezident tashrifi sharafiga O‘zbekiston bayrog‘i ranglaridagi dirijabl ham parvoz qildi.
Shuningdek, Prezident qarorgohi oldidagi favvorada O‘zbekiston davlat gerbi va bayrog‘i tasvirlari aks ettirildi.
Mazkur tadbirlar Janubiy Koreya tomonining O‘zbekiston davlat rahbarining tashrifiga ko‘rsatgan e’tibori va mehmondo‘stligini namoyon etdi.
