Isroil boykot qilindi: Pokiston Isroilga qarshi doskaga chiqmadi
Samarqandda o‘tayotgan 46-FIDE Jahon shaxmat Olimpiadasining birinchi turida Pokiston shaxmat federatsiyasi shaxmatchilarini Isroilga qarshi o‘ynatmadi.
Samarqandda o‘tkazilayotgan 46-FIDE Jahon shaxmat Olimpiadasining birinchi turida Pokiston va Isroil terma jamoalari o‘rtasidagi uchrashuv amalda o‘tkazilmadi.
Turnirning rasmiy natijalariga ko‘ra, Pokiston terma jamoasi ochiq turnirning to‘rtta doskasida ham shaxmatchilarini Isroil vakillariga qarshi o‘ynatmagan. Natijada Isroil jamoasiga 4:0 hisobida texnik g‘alaba qayd etilgan.
«Jerusalem Post» nashrining yozishicha, Pokiston shaxmat federatsiyasi prezidenti Sayyid Zeeshan Naqviy qaror mamlakatning Isroilga nisbatan rasmiy diplomatik pozitsiyasiga mos ekanini bildirgan. Uning so‘zlariga ko‘ra, federatsiya bu orqali Falastin xalqi bilan birdamlik ramzini namoyish etgan.
Shu bilan birga, Pokiston terma jamoasi turnirdagi ishtirokini davom ettirmoqda. Turnirning rasmiy maʼlumotlarida jamoaning keyingi uchrashuvlari ham qayd etilgan.
46-FIDE Jahon shaxmat Olimpiadasi 16 sentyabr kuni Samarqandda boshlandi. Musobaqada 200 dan ortiq jamoa ishtirok etmoqda.
Pokiston — Isroil uchrashuvi bo‘yicha rasmiy turnir qaydlarida barcha to‘rt doska natijasi ham Isroil foydasiga “+:-” ko‘rinishida qayd etilgan.
