Shavkat Mirziyoyev Serdar Berdimuhamedov bilan telefonda gaplashdi
O'zbekiston rahbari Turkmaniston Prezidentini tavallud kuni bilan tabrikladi.
22-sentabr kuni Shavkat Mirziyoyev Turkmaniston Prezidenti Serdar Berdimuhamedov bilan telefon orqali muloqot qildi.
Davlat rahbari Turkmaniston Prezidentini tavallud kuni bilan samimiy tabriklab, unga mustahkam sog‘liq, baxt-saodat va davlat faoliyatida yangi muvaffaqiyatlar tiladi.
Shavkat Mirziyoyev Turkman xalqining Milliy yetakchisi, Xalq Maslahati Raisi Gurbanguli Berdimuhamedovga ham o‘zining samimiy salomini yo‘lladi. Serdar Berdimuhamedov, o‘z navbatida, davlatimiz rahbariga Milliy yetakchi nomidan ezgu tilaklarni yetkazdi.
Suhbat davomida O‘zbekiston va Turkmaniston o‘rtasidagi do‘stlik, yaxshi qo‘shnichilik va strategik sheriklik munosabatlarini yanada rivojlantirish masalalari muhokama qilindi.
Tomonlar savdo-iqtisodiy hamkorlikni kengaytirishga alohida e’tibor qaratdi. Tovar ayirboshlash hajmi barqaror o‘sib borayotgani, energetika, transport va boshqa muhim yo‘nalishlarda kooperatsiya loyihalari amalga oshirilayotgani qayd etildi.
Shuningdek, “Shovot – Toshhovuz” qo‘shma savdo zonasining samarali faoliyatini ta’minlash muhimligi ta’kidlandi.
Muloqotda mintaqaviy kun tartibidagi ayrim masalalar, jumladan, Markaziy Osiyo va Ozarbayjon davlat rahbarlarining navbatdagi Maslahat uchrashuvi hamda Turkmanistonda bo‘lib o‘tadigan MDH sammitiga tayyorgarlik yuzasidan ham fikr almashildi.
Suhbat yakunida Shavkat Mirziyoyev Turkmaniston Prezidenti va xalqini yaqin kunlarda nishonlanadigan Mustaqillik kuni bilan tabrikladi.
