Jizzaxda 10 yoshli bolaga nisbatan jinsiy zo‘ravonlik: holat yuzasidan tergov boshlandi
Holatga aloqadorlikda gumon qilingan shaxs protsessual harakatlardan so‘ng o‘z joniga qasd qilgan.
Jizzax shahrida 2016-yilda tug‘ilgan voyaga yetmagan bolaga nisbatan jinsiy zo‘ravonlik sodir etilgani holati aniqlangan.
2-oktyabr kuni jabrlanuvchi bolaning onasi arizasi asosida Jinoyat kodeksining 119-moddasi 4-qismi bilan jinoyat ishi qo‘zg‘atilgan. Bu haqda Bosh prokratura matbuot kotibi Hayot Shamsuddinov Zamon.uz' ga ma'lum qildi.
2026-yil 3-oktyabr kuni sud ajrimiga asosan ayblanuvchi R .A. ga nisbatan sirtdan qamoqqa olish tarzidagi ehtiyot chorasi qo‘llanilib, unga nisbatan qidiruv e’lon qilingan.
Olib borilgan tergov va tezkor-qidiruv tadbirlari natijasida ayblanuvchi R.A.ning jasadi 4-oktyabr kuni o‘zi yashagan xonadonda osilgan holatda topilgan.
Hozirda holat yuzasidan tergov harakatlari davom ettirilmoqda.
Shuningdek, voyaga yetmagan bolaga nisbatan sodir etilgan jinoyat bilan bog‘liq ushbu holatda jabrlanuvchining shaxsini himoya qilish maqsadida uning shaxsiga oid ma’lumotlar, voqea tafsilotlari hamda bolani identifikatsiya qilish imkonini beruvchi boshqa ma’lumotlar oshkor etilmaydi.
Ijtimoiy himoya milliy agentligining ma'lum qilishicha, ayni vaqtda voyaga yetmagan bola xavfsiz joyda bo‘lib, uning huquq va qonuniy manfaatlarini himoya qilish, xavfsizligini ta’minlash hamda ruhiy holatini barqarorlashtirish bo‘yicha zarur choralar ko‘rilmoqda.
5-oktyabr kuni Jizzax shahar “Inson” ijtimoiy xizmatlar markazi tomonidan unga keys ochilib, u birlamchi baholashdan o‘tkazilgan va psixologik xizmat ko‘rsatish tashkil etilgan.
Holat yuzasidan tayinlangan ekspertiza natijalari ham kutilmoqda. Ekspertiza xulosasi olingach, uning natijalaridan kelib chiqib qo‘shimcha choralar belgilanadi.
