Har yili minglab o‘lat holatlari qayd etiladi — JSST
JSST vakili dunyo bo‘ylab o‘lat holatlari bo‘yicha statistikani maʼlum qildi.
Dunyoning turli mamlakatlarida har yili minglab gumon qilingan o‘lat holatlari qayd etiladi. Bu haqda JSSTning epidemiya va pandemiyaga tayyorgarlik va oldini olish bo‘yicha direktori Mariya Van Kerxove maʼlum qildi.
U Jenevada bo‘lib o‘tgan brifingda tashkilotga dunyo mamlakatlaridan har yili minglab gumon qilingan o‘lat holatlari haqida xabar kelib tushishini aytgan.
Van Kerxovening so‘zlariga ko‘ra, 2019–2025-yillarda 10 ta mamlakat JSSTga odamlarda o‘lat kasalligining qariyb 4 mingta gumon qilingan holati va 423 ta o‘lim qayd etilgani haqida maʼlumot bergan.
Qayd etilishicha, mazkur statistikaga o‘latning bubonik va pnevmonik shakllari ham kiradi.
JSST vakili o‘lat bakteriyalar tufayli yuzaga kelishini va kasallikni antibiotiklar yordamida davolash mumkinligini taʼkidladi.
