O‘zbekiston va Turkmaniston Oliy darajadagi strategik sheriklik kengashini tuzadi

 

Shavkat Mirziyoyev Turkmaniston Prezidenti Serdar Berdimuhamedov bilan uchrashuv o‘tkazdi.

 

Suhbat avvalida Shavkat Mirziyoyev Serdar Berdimuhamedovni Turkmaniston mustaqilligining 35 yilligi, shuningdek, Markaziy Osiyo va Ozarbayjon davlat rahbarlarining Maslahat uchrashuviga mezbonlik qilgani hamda Mustaqil Davlatlar Hamdo‘stligidagi samarali raisligi bilan tabrikladi.

 

Uchrashuvda O‘zbekiston va Turkmaniston o‘rtasidagi strategik sheriklik munosabatlarini yanada chuqurlashtirish masalalari muhokama qilindi.

 

Tomonlar savdo-iqtisodiy hamkorlikdagi ijobiy sur’atlarni mamnuniyat bilan qayd etdi. Yil boshidan buyon o‘zaro tovar ayirboshlash hajmi barqaror o‘sib borayotgani, “Shovot – Toshovuz” chegaraoldi savdo zonasi esa muvaffaqiyatli faoliyat yuritayotgani ta’kidlandi.

 

O‘zaro savdo hajmini bir necha barobar oshirish bo‘yicha chora-tadbirlar rejasini qabul qilish, shuningdek, sanoat, energetika, transport, qishloq va suv xo‘jaligi sohalarida Kooperatsiya dasturini amalga oshirish muhimligi qayd etildi.

 

Mazkur hamkorlikni ikki mamlakat hududlari darajasida ham kengaytirish zarurligi ta’kidlandi.

 

Uchrashuv yakunida O‘zbekiston va Turkmaniston o‘rtasida Oliy darajadagi strategik sheriklik kengashini tuzish to‘g‘risida bitim imzolandi.

 

Ushbu hujjat ikki davlat o‘rtasidagi siyosiy muloqotni yanada chuqurlashtirish, shuningdek, ustuvor yo‘nalishlarda amaliy hamkorlikni kengaytirish uchun mustahkam institutsional asos yaratadi.