Amudaryo qurib boryaptimi? Vazirlik vaziyatga izoh berdi

 

Ijtimoiy tarmoqlarda Amudaryoning qurib borayotgani haqida xabarlar tarqaldi. Suv xo‘jaligi vazirligi ushbu xabarlarga munosabat bildirib, daryodagi gidrologik vaziyat yuzasidan ma’lumot berdi.

 

Amudaryo Tojikiston va Afg‘oniston hududlaridagi tog‘lardan boshlanuvchi Panj va Vaxsh daryolarining qo‘shilishidan hosil bo‘ladi. Kofarnihon daryosi ham Amudaryoning yirik irmoqlaridan biri hisoblanadi.

 

Amudaryo havzasining yuqori qismida, Tojikiston hududidagi Vaxsh daryosida Norak suv ombori joylashgan. 2026-yil 9-oktyabr holatiga ko‘ra, suv omboriga sekundiga 408 kub metr suv kelib tushmoqda, undan chiqarilayotgan suv miqdori esa sekundiga 320 kub metrni tashkil etmoqda. Suv omboridagi jami suv hajmi 10 milliard 540 million kub metrga teng.

 

Amudaryoning O‘zbekiston hududiga kirib keladigan qismidagi suv sathi Termiz gidropostida kuzatiladi. 9-oktyabr kuni ushbu gidropostda suv sathi 239 santimetrni tashkil etgan. Bu o‘tgan yilning shu davriga nisbatan 27 santimetr yuqori.

 

Shu bilan birga, Kerki gidropostida suv sarfi sekundiga 499 kub metrni tashkil etmoqda. Bu ko‘rsatkich 2025-yilning mos davriga nisbatan sekundiga 63 kub metrga kam.

 

Vazirlik qayd etishicha, keltirilgan gidrologik ko‘rsatkichlar Amudaryoda suv oqimi saqlanib qolayotganini ko‘rsatadi.

 

Shuningdek, sentyabr–oktyabr oylarida daryolarda suv sarfi va sathining pasayishi mavsumiy gidrologik jarayon hisoblanadi. Vegetatsiya mavsumi yakunlanishi munosabati bilan suv omborlarida kelgusi mavsum ehtiyojlari uchun suv zaxiralari to‘planmoqda.