Darsdan chiqarib, xonaga olib kirgan: o‘quvchiga shilqimlik qilgan texnikum xodimi ishdan olindi
Shuningdek, yana ikki xodim ishdan bo'shatilib, uch nafariga hayfsan berilgan.
Surxondaryo viloyati Jarqo‘rg‘on tumanida voyaga yetmagan o‘quvchiga shilqimlik qilgan texnikum xodimi ishdan bo‘shatildi. Holat yuzasidan o‘tkazilgan xizmat o‘rganishi natijasida yana ikki rahbar va psixolog lavozimidan ozod etilgan, uch nafar xodimga hayfsan berilgan. Bu haqda Kasbiy ta’lim agentligi ma’lum qildi.
Sud hujjatiga ko‘ra, ishlab chiqarish ta’limi ustasi K.E. o‘ziga biriktirilgan guruhda tahsil olayotgan qizni o‘qituvchidan ruxsat olib darsdan chiqargan va kafedra xonasiga olib kirgan. U yerda o‘quvchiga nisbatan shahvoniy tusdagi harakatlarni sodir etgan. Qiz qarshilik ko‘rsatib, xonadan chiqib ketgan.
Shu kuni darslar tugagach, xodim boshqa raqamdan qo‘ng‘iroq qilib, o‘zini boshqa ism bilan tanishtirgan va o‘quvchini sport zaliga chaqirgan. Qiz u yerga borganida unga yana shilqimlik qilgan.
30-sentabr kuni o‘quvchining otasi holat yuzasidan ichki ishlar organlariga murojaat qilgan. Shundan so‘ng Kasbiy ta’lim agentligi tomonidan tuzilgan ishchi guruh texnikumda xizmat o‘rganishini o‘tkazgan. Unda voqea sabablari hamda mas’ul xodimlarning xizmat vazifalarini qay darajada bajargani tekshirilgan.
O‘rganish natijalariga ko‘ra, texnikum direktorining yoshlar bilan ishlash bo‘yicha o‘rinbosari I.CH. va psixolog Y.K. lavozimidan ozod etilgan. O‘quv ishlari bo‘yicha direktor o‘rinbosari D.T., ishlab chiqarish ta’limi bo‘yicha direktor o‘rinbosari B.U. hamda fizika fani o‘qituvchisi G.T.ga hayfsan berilgan. O‘quvchiga nisbatan nomaqbul xatti-harakat sodir etgan ishlab chiqarish ta’limi ustasi K.E. bilan tuzilgan mehnat shartnomasi esa bir tomonlama bekor qilingan.
Agentlik mazkur qarorlar qonunchilik talablari va ta’lim tizimida xavfsiz, hurmatga asoslangan muhitni ta’minlashga qaratilgan ichki buyruq asosida qabul qilinganini bildirgan.
Kasbiy ta’lim agentligi o‘quvchilarning sha’ni, qadr-qimmati va shaxsiy daxlsizligiga tajovuz qiluvchi har qanday xatti-harakatni qat’iy qoralashini ma’lum qilgan. Shuningdek, bunday holatlarning oldini olish, o‘quvchilarning murojaatlarini o‘z vaqtida o‘rganish va har bir holatga xolis munosabat bildirish bo‘yicha mas’ul rahbar hamda xodimlarning javobgarligini kuchaytirish rejalashtirilgan.
