Osiyoda ishonch, texnologiya va iqlim: Shavkat Mirziyoyev uchta tashabbusni taklif qildi

 

Shavkat Mirziyoyev Bokuda bo‘lib o‘tgan Osiyoda hamkorlik va ishonch choralari bo‘yicha kengashning (OHIChK) yettinchi sammitida ishtirok etdi. Davlat rahbari o‘z nutqida Osiyoda davlatlar o‘rtasidagi ishonchni mustahkamlash, texnologik hamkorlikni rivojlantirish va iqlim o‘zgarishlariga qarshi birgalikda harakat qilish bo‘yicha qator tashabbuslarni ilgari surdi.

 

Sammitda turli mamlakatlar rahbarlari, hukumatlar va tashqi ishlar idoralari vakillari, shuningdek, xalqaro tashkilotlar delegatsiyalari ishtirok etdi.

 

Shavkat Mirziyoyev dunyodagi chuqur geosiyosiy o‘zgarishlar davlatlardan yanada yaqin hamkorlik va birgalikda qarorlar qabul qilishni talab etayotganini ta’kidladi. Uning qayd etishicha, Osiyoning turli hududlaridagi qurolli mojarolar nafaqat bevosita mojaro ishtirokchilariga, balki boshqa mintaqalar xavfsizligi, global iqtisodiyot va millionlab insonlar hayotiga ham salbiy ta’sir ko‘rsatmoqda.

 

Prezident har qanday nizo va kelishmovchiliklar faqat tinch yo‘l bilan, siyosiy-diplomatik vositalar orqali, xalqaro huquq hamda barcha tomonlarning manfaatlarini hisobga olgan holda hal etilishi lozimligini bildirdi.

 

Davlat rahbari Osiyoda barqaror munosabatlar tizimini shakllantirishda OHIChK muhim o‘rin tutishini qayd etib, Osiyoda ishonch infratuzilmasini shakllantirish konsepsiyasini ishlab chiqishni taklif qildi. Ushbu hujjatda davlatlar o‘rtasidagi o‘zaro bog‘liqlik va hamkorlikni kengaytirishning ustuvor yo‘nalishlari hamda aniq chora-tadbirlarini belgilash nazarda tutiladi.

 

Prezident transport va energetika sohasidagi qo‘shma loyihalar, savdo va raqamli aloqalarni rivojlantirish, madaniy-gumanitar almashinuvlarni kengaytirish ishonchni mustahkamlashning muhim omillari ekanini ta’kidladi.

 

Shavkat Mirziyoyev texnologik taraqqiyot va iqlim o‘zgarishlari davlatlar oldiga yangi vazifalarni qo‘yayotganiga ham e’tibor qaratdi. Uning so‘zlariga ko‘ra, sun’iy intellekt katta imkoniyatlar yaratish bilan birga jiddiy xavf-xatarlarni ham keltirib chiqarmoqda.

 

Shu munosabat bilan Texnologik ishonch va sun’iy intellektdan mas’uliyat bilan foydalanish bo‘yicha Osiyo tashabbusi ilgari surildi. Uni amalga oshirish doirasida OHIChK huzurida ekspertlar maydonini tashkil etish taklif qilindi. Ushbu maydonda mutaxassislar umumiy tavsiyalar ishlab chiqishi va amaliy choralarni kelishib olishi mumkin bo‘ladi.

 

Shuningdek, OHIChKga a’zo davlatlarning iqlim o‘zgarishlariga moslashish borasidagi sa’y-harakatlarini birlashtirish maqsadida iqlim barqarorligi bo‘yicha hamkorlikni yo‘lga qo‘yish taklif etildi.

 

O‘zbekiston OHIChKning inson mezoni bo‘yicha koordinatori ekani qayd etildi. Shu munosabat bilan mamlakat kelgusi yili Inson salohiyatini rivojlantirish bo‘yicha forum o‘tkazishga tayyorligi bildirildi. Shuningdek, Kengashning 2028-yilgacha mo‘ljallangan Harakatlar dasturini ishlab chiqish muhimligi ta’kidlandi.

 

O‘zbekiston Qo‘shilmaslik harakatiga raislikni qabul qilishi munosabati bilan davlat rahbari tashkilotning kelgusi yili Toshkentda o‘tkaziladigan yigirmanchi sammitiga ishtirokchilarni taklif qildi.

 

Shavkat Mirziyoyev, shuningdek, OHIChKning tashkiliy asoslarini mustahkamlash va uning nizomini takomillashtirish bo‘yicha ishlarni qo‘llab-quvvatlashini bildirdi. U Kengash bosh kotibi lavozimiga Ozarbayjon tomonidan ilgari surilgan nomzodni qo‘llab-quvvatlashini ma’lum qilib, Ozarbayjonning tashkilotga raislikni 2028-yilgacha davom ettirish niyatini olqishladi.