Saida Mirziyoyeva Turkiyaning ta’lim tajribasi bilan tanishdi
Tashrif davomida o‘quvchilar, talabalar va pedagoglar uchun yangi imkoniyatlar yaratish masalalari muhokama qilindi.
Saida Mirziyoyeva Istanbul shahriga tashrifi davomida Najmiddin Bilol Erdo‘g‘an bilan birgalikda Ibn Xaldun universiteti va “Yenidog‘u” maktabiga bordi.
Tashrif davomida mazkur ta’lim muassasalarining o‘qitish uslublari va ta’lim jarayoniga yondashuvlari bilan tanishildi. Saida Mirziyoyeva ta’lim sifatini oshirish, yoshlarning iqtidorini yuzaga chiqarish hamda ularda mustaqil fikrlash ko‘nikmalarini shakllantirishga qaratilgan amaliyotlarga alohida qiziqish bildirdi.
Uchrashuvlarda O‘zbekiston va Turkiya ta’lim muassasalari o‘rtasidagi hamkorlikni kengaytirish, tajriba almashish hamda maktab o‘quvchilari, talabalar va pedagoglar uchun yangi imkoniyatlar yaratish masalalari muhokama qilindi. Tomonlar ushbu yo‘nalishlarda aloqalarni rivojlantirishga kelishib oldi.
Ta’lim sohasi O‘zbekiston va Turkiya o‘rtasidagi do‘stona munosabatlarning muhim yo‘nalishlaridan biri hisoblanadi. Mazkur sohadagi hamkorlik yoshlarning bilim va dunyoqarashini kengaytirish, shuningdek, ikki xalq o‘rtasidagi o‘zaro anglashuvni yanada mustahkamlashga xizmat qiladi.
