O‘zbekistonda o‘limlar soni kamaydi: 9 oyda 123,4 ming kishi vafot etdi
O‘lim holatlari soni so‘nggi besh yilning yanvar–sentyabr oylari orasida eng past ko‘rsatkichni qayd etdi.
O‘zbekistonda 2026-yilning yanvar–sentyabr oylarida 123,4 mingta o‘lim holati qayd etildi. Bu o‘tgan yilning mos davriga nisbatan 8,8 ming nafarga yoki qariyb 6,7 foizga kam.
Milliy statistika qo‘mitasining 27-oktyabr kuni e’lon qilingan hisobotiga ko‘ra, 2025-yilning dastlabki to‘qqiz oyida mamlakatda 132,2 ming kishi vafot etgan. Joriy yilning shu davrida o‘lim koeffitsiyenti 4,2 promilleni tashkil etgan.
So‘nggi besh yilning yanvar–sentyabr oylarida qayd etilgan o‘lim holatlari quyidagicha:
-
2022-yil — 130,2 ming kishi;
-
2023-yil — 129,7 ming kishi;
-
2024-yil — 131,7 ming kishi;
-
2025-yil — 132,2 ming kishi;
-
2026-yil — 123,4 ming kishi.
Shunday qilib, joriy yilning dastlabki to‘qqiz oyidagi o‘lim holatlari soni so‘nggi besh yilning mos davrlari orasida eng past bo‘lgan.
Hisobotga ko‘ra, yanvar–sentyabr oylarida vafot etganlarning 68,5 ming nafari yoki 55,5 foizi erkaklar, 54,9 ming nafari yoki 44,5 foizi ayollar hissasiga to‘g‘ri kelgan. Erkaklar orasidagi o‘lim holatlari ayollarnikidan 13,6 ming nafarga ko‘p.
Yashash joyi bo‘yicha esa vafot etganlarning 65,7 ming nafari, ya’ni 53,2 foizi shaharlarda, 57,7 ming nafari yoki 46,8 foizi qishloq joylarda yashagan.
2026-yilning dastlabki to‘qqiz oyida O‘zbekistonda 638,6 ming nafar bola tirik tug‘ilgan. Bu 2025-yilning mos davriga nisbatan 26 ming nafarga kam.
Tug‘ilish va o‘lim ko‘rsatkichlari o‘rtasidagi farq hisobiga aholining tabiiy o‘sishi 515,2 ming kishini tashkil etgan.
