Prezident Olimpiadasi: yoshlar 26 ta sport turi bo'yicha kuch sinashadi
Musobaqa mamlakat hududlaridagi iqtidorlarni saralash va professional sportga yo'naltirishga xizmat qiladi.
Prezident Shavkat Mirziyoyev ikkinchi bor o‘tkazilayotgan Prezident Olimpiadasining ochilish marosimida ishtirok etdi. Davlat rahbari sportchi yoshlar, murabbiylar va sport fidoyilarini musobaqa boshlanishi bilan tabrikladi.
Bu yilgi musobaqalarda O‘zbekistonning turli hududlaridan kelgan 3,5 mingdan ziyod yosh sportchi olimpiya va paralimpiya yo‘nalishidagi 26 ta sport turi bo‘yicha bellashadi. Ularga 1,5 ming murabbiy hamrohlik qilmoqda.
Ochilish marosimida so‘zga chiqqan davlat rahbari ishtirokchilar musobaqaga o‘z orzulari, maqsadlari va g‘alabaga bo‘lgan ishonchi bilan kelganini ta’kidladi. Shuningdek, bugungi yosh sportchilar orasidan kelajakda xalqaro maydonda yuksak natijalarga erishadigan chempionlar va rekordchilar yetishib chiqishiga ishonch bildirdi.
Prezident so‘nggi yillarda O‘zbekistonda ommaviy sportdan professional sportgacha, iqtidorli yoshlarni saralashdan xalqaro musobaqalarga tayyorlashgacha bo‘lgan yaxlit tizim shakllantirilganini qayd etdi. Bu ishlar yoshlarni sog‘lom, irodali va mustaqil fikrlaydigan insonlar etib tarbiyalashga qaratilganini bildirdi.
Keltirilishicha, so‘nggi o‘n yil ichida o‘zbekistonlik sportchilar yirik xalqaro musobaqalarda jami 5 518 ta medal qo‘lga kiritgan. Shundan 1 675 tasi oltin medal bo‘lib, bu ko‘rsatkich avvalgi o‘n yillikka nisbatan uch baravar ko‘p. Medallarning uchdan bir qismi sportchi qizlar hissasiga to‘g‘ri keladi.
Shuningdek, Samarqandda o‘tkazilgan Butunjahon shaxmat olimpiadasida O‘zbekiston erkaklar terma jamoasining ikkinchi bor g‘olib bo‘lgani mamlakat shaxmat tarixidagi muhim natijalardan biri sifatida qayd etildi.
