O‘zbekistonga tijorat safarlari ko‘paydi: afg‘onistonliklar yetakchi
To‘qqiz oy davomida Afg‘onistondan 323 660 nafar fuqaro kelgan.
2026-yilning yanvar–sentyabr oylarida 357,5 ming nafar chet el fuqarosi O‘zbekistonga tijorat maqsadida tashrif buyurdi. Bu haqda Milliy statistika qo‘mitasi ma’lum qildi.
Qayd etilishicha, bu ko‘rsatkich 2025-yilning mos davriga nisbatan 34,8 ming nafarga yoki 10,8 foizga oshgan. Tijorat maqsadida O‘zbekistonga kelgan xorijliklar orasida Afg‘oniston fuqarolari eng katta ulushni tashkil etmoqda. To‘qqiz oy davomida ushbu mamlakatdan 323 660 nafar fuqaro kelgan.
Keyingi o‘rinlarda Turkmaniston va Tojikiston qayd etilgan. Ushbu mamlakatlardan mos ravishda 24 196 va 6 412 nafar fuqaro tijorat maqsadida O‘zbekistonga kelgan.
Shuningdek, hisobot davrida Qirg‘iz Respublikasidan 695 nafar, Qozog‘istondan 629 nafar, Rossiyadan 370 nafar va Turkiyadan 346 nafar fuqaro tashrif buyurgan. Boshqa davlatlardan kelganlar soni esa 1 150 nafarni tashkil etgan.
