Terrorizm va ekstremizmga qarshi kurash: Samarqandda SHHT plyus ekspertlar muloqoti o‘tkaziladi
Unda 24 davlatdan 33 ta delegatsiya va 5 ta xalqaro tashkilot vakillari ishtirok etishi kutilmoqda.
2026-yil 5–6-noyabr kunlari Samarqand shahrida Xavfsizlik masalalari bo‘yicha SHHT plyus birinchi ekspertlar muloqoti bo‘lib o‘tadi.
«Raqamli transformatsiya davrida xavfsizlik: yangi texnologiyalar rivojlanishini hisobga olgan holda terrorizm va ekstremizmga qarshi kurashish» mavzusidagi tadbir O‘zbekiston Respublikasi Davlat xavfsizlik xizmati raisi, general-polkovnik B. Qurbonov raisligida o‘tkaziladi.
Mazkur formatni tashkil etish tashabbusi Prezident Shavkat Mirziyoyev tomonidan 2024-yilda SHHTning Ostona sammitida ilgari surilgan. 2025-yilda Tyantszinda bo‘lib o‘tgan SHHTga a’zo davlatlar rahbarlari kengashi yig‘ilishida ilk ekspertlar muloqotini Samarqandda o‘tkazish taklif qilingan edi.
Uchrashuvda SHHTga a’zo davlatlar, kuzatuvchilar va muloqot bo‘yicha hamkorlar maxsus xizmatlari rahbarlari hamda vakillari, xalqaro tashkilotlar vakillari va taklif etilgan mehmonlar ishtirok etadi. Dunyoning 24 davlatidan 33 ta delegatsiya hamda 5 ta xalqaro tashkilot vakillarining kelishi kutilmoqda.
Muloqot davomida ilg‘or texnologiyalar va sun’iy intellektning zamonaviy tahdid hamda xavf-xatarlarga ta’siri muhokama qilinadi.
Tadbir yakunida delegatsiyalar rahbarlari raqamli transformatsiya davrida xalqaro terrorizm va ekstremizmga qarshi kurashish bo‘yicha hamkorlikning aniq vazifalari va ustuvor yo‘nalishlarini belgilab olishlari ko‘zda tutilgan.
